Ahmedabad : શહેરમાં સાયબર ગુનેગારોએ છેતરપિંડીનો એક સનસનાટીભર્યો માર્ગ અપનાવ્યો છે. રિઝર્વ બેંક ઓફ ઈન્ડિયા (Reserve Bank of India – RBI)ના નામે મોકલેલી એક નકલી ઝિપ ફાઈલ (Zip File) દ્વારા રીઅલ એસ્ટેટ એજન્ટ (Real Estate Agent)ની ઓફિસનું આખું કમ્પ્યુટર હેક કરી લેવામાં આવ્યું હતું. આ ડિજિટલ સેંધમારી બાદ હેકર્સે કંપનીના માલિકના નામે નકલી વોટ્સએપ એકાઉન્ટ (WhatsApp Account) બનાવીને એકાઉન્ટન્ટને છેતરીને રૂ. 1.5 કરોડની અધધ રકમ અન્ય ખાતામાં ટ્રાન્સફર કરાવી લીધી હતી. આ હાઈટેક લૂંટ અંગે ભોગ બનનારે અમદાવાદ સાયબર ક્રાઈમ (Cyber Crime) પોલીસ સ્ટેશનમાં સત્તાવાર ફરિયાદ નોંધાવી છે.
ઝિપ ફાઈલ ઓપન કરતા જ કમ્પ્યુટર હેક થયું
આ ઘટનાની વિગત એવી છે કે અમદાવાદના પ્રખ્યાત બોડકદેવ (Bodakdev) વિસ્તારમાં રહેતા 48 વર્ષીય પ્રવિણભાઈ નાગજીભાઇ બવાડીયા (Pravinbhai Nagjibhai Bavadiya) રીઅલ એસ્ટેટ એજન્ટ તરીકે મોટો વ્યવસાય કરે છે. ગત 23 જૂનના રોજ તેમના મોબાઈલ પર એક અજાણ્યા નંબર પરથી મેસેજ આવ્યો હતો. આ મેસેજ સાથે આરબીઆઈના સિક્કા અને લેટરહેડ જેવી દેખાતી એક શંકાસ્પદ ઝિપ ફાઈલ જોડવામાં આવી હતી. પ્રવિણભાઈએ આ ફાઈલ શું છે તે તપાસવા માટે તેમના એકાઉન્ટન્ટ (Accountant)ને ફોરવર્ડ કરી હતી. એકાઉન્ટન્ટે ઓફિસના કમ્પ્યુટરમાં વોટ્સએપ વેબ (WhatsApp Web) ખોલીને જેવી આ ફાઈલ ડાઉનલોડ કરીને ઓપન કરી, કે તરત જ કમ્પ્યુટરનું તમામ નિયંત્રણ (Access) હેકર્સના હાથમાં જતું રહ્યું હતું.
બોસના નામે નકલી વોટ્સએપ પ્રોફાઈલ બનાવી છેતરપિંડી
કમ્પ્યુટર હેક કર્યા બાદ સાયબર ઠગોએ આગલા જ દિવસે એક નવો પ્લાન અમલમાં મૂક્યો હતો. હેકર્સે પ્રવિણભાઈના જ ફોટો (DP)નો ઉપયોગ કરીને એક નવું વોટ્સએપ એકાઉન્ટ બનાવ્યું અને તેનું નામ ‘પ્રવીણ સર’ રાખ્યું હતું. ત્યારબાદ ઠગે એકાઉન્ટન્ટને મેસેજ કરીને જણાવ્યું કે, “હું અત્યારે એક ખુબ જ અગત્યની મીટિંગ (Meeting)માં વ્યસ્ત છું, તેથી ફોન ઉપાડી શકીશ નહીં.” આ સાથે જ ઠગે ‘બેલાર ગારમેન્ટ પ્રાઇવેટ લિમિટેડ’ (Belar Garment Private Limited) નામના બેન્ક એકાઉન્ટની તમામ વિગતો મોકલી આપી હતી અને તેમાં તાત્કાલિક ધોરણે રૂ. 1,50,00,000 (1.5 કરોડ) ટ્રાન્સફર કરવાનો આદેશ આપ્યો હતો.
આરટીજીએસ (RTGS) થતાં જ કરોડોની છેતરપિંડી પ્રકાશમાં આવી
એકાઉન્ટન્ટને લાગ્યું કે આ મેસેજ ખરેખર તેના બોસ પ્રવિણભાઈએ જ મોકલ્યો છે, તેથી તેણે કોઈપણ પ્રકારની શંકા કર્યા વિના તાત્કાલિક આરટીજીએસ (RTGS) મારફતે જણાવેલા ખાતામાં 1.5 કરોડ રૂપિયા ટ્રાન્સફર કરી કરી દીધા હતા. આ ટ્રાન્ઝેક્શન સફળ થતાં જ પ્રવિણભાઈના પર્સનલ મોબાઈલ પર બેન્કમાંથી મેસેજ આવ્યો હતો. આટલી મોટી રકમ કપાઈ જતાં ચોંકી ઉઠેલા પ્રવિણભાઈએ તુરંત જ એકાઉન્ટન્ટને ફોન કરીને પૂછપરછ કરી હતી. બંને વચ્ચેની વાતચીત દરમિયાન ખુલાસો થયો કે પ્રવિણભાઈએ આવો કોઈ મેસેજ મોકલ્યો જ નહોતો. પોતાની સાથે કરોડો રૂપિયાની ઓનલાઈન લૂંટ થઈ હોવાનું સમજાતા જ તેઓએ તાત્કાલિક પોલીસનો સંપર્ક કર્યો હતો. સાયબર ક્રાઈમ પોલીસે ગુનો નોંધી બેન્ક ખાતાઓ ફ્રીઝ કરવાની અને હેકર્સને ટ્રેસ કરવાની કાર્યવાહી હાથ ધરી છે.
