અંબાણી પાછળ છૂટ્યા! જાણો કોણ છે એશિયાના નવા બીજા સૌથી અમીર વ્યક્તિ?

Asia Richest Person List: દુનિયાની ટેક ઈન્ડસ્ટ્રીમાં દરરોજ નવી વાર્તાઓ બને છે, પરંતુ કેટલીક કહાનીઓ આખી દુનિયાને ચોંકાવી દે છે. આવી જ એક વાર્તા ટિકટોક (TikTok) બનાવનારા ઝાંગ યિમિંગ (Zhang Yiming) ની છે, જેમણે તાજેતરમાં એશિયાના સૌથી અમીર લોકોની યાદીમાં મુકેશ અંબાણી (Mukesh Ambani) ને પાછળ છોડી દીધા છે. બાઈટડાન્સ (ByteDance) એટલે કે ટિકટોકના ફાઉન્ડર હવે એશિયાના બીજા સૌથી અમીર વ્યક્તિ બની ગયા છે. ફોર્બ્સ (Forbes) ની તાજી રેન્કિંગના ડેટા અનુસાર, ઝાંગ યિમિંગની નેટવર્થ 92.8 બિલિયન ડૉલર્સ છે, જ્યારે રિલાયન્સ (Reliance) ના ચેરમેન મુકેશ અંબાણીની નેટવર્થ 86.9 બિલિયન ડૉલર છે. આ યાદીમાં પ્રથમ સ્થાને ગૌતમ અદાણી (Gautam Adani) છે, જેમની નેટવર્થ 117.4 બિલિયન ડૉલર છે.

ચાર રૂમના ફ્લેટથી શરૂ થઈ ટિકટોકની સફર
આ માત્ર સંપત્તિની વાર્તા નથી, પરંતુ એક એવા માણસની સફર છે જેણે સામાન્ય શરૂઆત કરીને દુનિયાની સૌથી મોટી ટેક કંપનીઓમાંથી એક ઊભી કરી દીધી. ચીન (China) માં જન્મેલા ઝાંગ યિમિંગનો ઉછેર કોઈ મોટા બિઝનેસ પરિવારમાં થયો ન હતો. તેમણે સોફ્ટવેર એન્જિનિયરિંગનો અભ્યાસ કર્યો અને કારકિર્દીની શરૂઆત એક સામાન્ય આઈટી (IT) કર્મચારી તરીકે કરી હતી. શરૂઆતના દિવસોમાં તેઓ એક નાના એપાર્ટમેન્ટમાં રહેતા હતા, જ્યાં માત્ર ચાર રૂમમાં જ તેમનું આખું કામ અને જીવન ચાલતું હતું. પરંતુ તેમની વિચારસરણી અલગ હતી. તેઓ માનતા હતા કે ઈન્ટરનેટ માત્ર માહિતી મેળવવાનું સાધન નથી, પણ યુઝર્સના બિહેવિયરને સમજીને તેમને ગમતું કન્ટેન્ટ પીરસવાનું સૌથી મોટું માધ્યમ છે.

ન્યૂઝ એપ ‘Toutiao’ થી મળી મોટી સફળતા
તેમણે વર્ષ 2012 માં બાઈટડાન્સ (ByteDance) કંપનીની સ્થાપના કરી. તેમનો પહેલો મોટો સક્સેસફુલ પ્રોડક્ટ ‘Toutiao’ નામની એક ન્યૂઝ એપ હતી. આ કોઈ સામાન્ય એપ નહોતી, પણ તેમાં એડવાન્સ અલ્ગોરિધમ (Algorithm) નો ઉપયોગ કરવામાં આવ્યો હતો. આ અલ્ગોરિધમ દરેક યુઝરની પસંદગી સમજીને તેને અલગ-અલગ સમાચાર બતાવતું હતું. આ સફળતા બાદ તેમણે વીડિયો કન્ટેન્ટ પર ધ્યાન કેન્દ્રિત કર્યું અને અહીંથી જ ટિકટોકની શરૂઆત થઈ. ટિકટોકે ટૂંકા વીડિયો (Short Videos) નો ટ્રેન્ડ શરૂ કરીને સોશિયલ મીડિયાની દુનિયા બદલી નાખી.

જ્યારે મેટા (Meta) જેવી દિગ્ગજ કંપનીએ પણ કરી નકલ
જોતજોતામાં ટિકટોક દુનિયાની સૌથી ઝડપથી વિકસતી એપ બની ગઈ. ભારતમાં સુરક્ષાના કારણોસર ટિકટોક પર પ્રતિબંધ (Ban) છે અને અન્ય દેશોમાં પણ તેને વિવાદોનો સામનો કરવો પડ્યો છે, પરંતુ અમેરિકા (America) જેવા દેશોમાં તે આજે પણ નંબર-1 પર છે. ટિકટોકની લોકપ્રિયતા એટલી વધી ગઈ કે મેટા (Meta) જેવી મોટી કંપનીઓએ પણ તેના ફીચર્સ કોપી કરવા પડ્યા. આજે ઇન્સ્ટાગ્રામ (Instagram) પર જે રીલ્સ (Reels) ધૂમ મચાવી રહી છે, તે વાસ્તવમાં ટિકટોકની જ દેન છે.

લાઈમલાઈટથી હંમેશા દૂર રહે છે ઝાંગ યિમિંગ
આટલી મોટી સફળતા અને અઢળક સંપત્તિ હોવા છતાં ઝાંગ યિમિંગ હંમેશા લો-પ્રોફાઇલ (Low Profile) રહેવાનું પસંદ કરે છે. તેઓ લાઈમલાઈટથી દૂર રહે છે. તેમણે વર્ષ 2021 માં બાઈટડાન્સના સીઈઓ (CEO) પદેથી રાજીનામું આપી દીધું હતું જેથી તેઓ લાંબા ગાળાની વ્યૂહરચના પર કામ કરી શકે. તેમની સફળતાનું રહસ્ય ડેટા અને અદભુત ટેકનોલોજી પરનો તેમનો ભરોસો છે.