Gujarat Weather News: રાજ્યમાં સતત વરસી રહેલા ચોમાસાના આગમન વચ્ચે છેલ્લા 24 કલાકમાં મેઘરાજાએ સમગ્ર ગુજરાતને ધમરોળ્યું છે. સ્ટેટ ઇમરજન્સી ઓપરેશન સેન્ટરના આંકડા મુજબ રાજ્યના 173 તાલુકાઓમાં નોંધપાત્ર વરસાદ નોંધાયો છે. સૌથી વધુ માઠું પરિણામ દક્ષિણ ગુજરાતના જિલ્લાઓએ ભોગવવું પડ્યું છે, જ્યાં મુસળધાર વરસાદના કારણે નદી-નાળા ઉભરાઈ ગયા છે અને નીચાણવાળા વિસ્તારોમાં પાણી ભરાઈ ગયા છે.
વલસાડ અને નવસારી જિલ્લામાં આકાશી આફત
વરસાદના આંકડાઓ પર નજર કરીએ તો વલસાડ (Valsad) જિલ્લાના કપરાડા (Kaprada) તાલુકામાં સૌથી વધુ 16 ઇંચ ભારે વરસાદ ખાબક્યો છે. આ સિવાય વલસાડના નાનાપોંઢા (Nana Pondha)માં પણ 11 ઇંચથી વધુ વરસાદ થતાં ચારેય તરફ જળબંબાકાર જેવા દ્રશ્યો સર્જાયા છે. નવસારી (Navsari) જિલ્લાના ચીખલી (Chikhli) તાલુકામાં પણ આકાશી આફત રૂપે 10 ઇંચ વરસાદ વરસ્યો છે.
દક્ષિણ ગુજરાતના અન્ય વિસ્તારોની વાત કરીએ તો પારડી (Pardi) અને વાંસદા (Vansda) તાલુકામાં 9 ઇંચથી વધુ વરસાદ નોંધાયો છે. આ ઉપરાંત વલસાડ શહેર, વાપી (Vapi) અને ખેરગામ (Khergam)માં પણ 8 ઇંચથી વધુ આકાશી પાણી વરસતા જનજીવન અસ્તવ્યસ્ત બન્યું છે.
ડાંગ અને સુરતમાં પણ ધોધમાર વરસાદ
ડાંગ (Dang) અને સુરત (Surat) જિલ્લાના વિવિધ વિસ્તારોમાં પણ મેઘરાજા મન મૂકીને વરસ્યા છે. વધઈ (Vadhai), ધરમપુર (Dharampur) અને બારડોલી (Bardoli)માં 6 થી 7 ઇંચ જેટલો ભારે વરસાદ પડ્યો છે. જ્યારે ઉમરગામ (Umbergaon), ડાંગ જિલ્લા મથક અને ગણદેવી (Gandevi)માં ૫ થી સાડા ૫ ઇંચ સુધીનો વરસાદ નોંધાયો છે.
સુરત (Surat) શહેર, પલસાણા (Palsana) અને અંબિકા (Ambika) નદીના કેચમેન્ટ વિસ્તારોમાં 4 થી સાડા 4 ઇંચ વરસાદ વરસવાના અહેવાલ છે. આ ભારે વરસાદના કારણે સ્થાનિક લો-લેવલ કોઝવે પાણીમાં ગરકાવ થઈ ગયા છે.
રાજ્યના અન્ય તાલુકાઓની સ્થિતિ
હવામાન વિભાગ અને આપત્તિ વ્યવસ્થાપન વિભાગના જણાવ્યા અનુસાર, રાજ્યના 20 જેટલા તાલુકાઓમાં 2 થી 3 ઇંચ સુધીનો સામાન્યથી ભારે વરસાદ નોંધાયો છે. આ સિવાયના અન્ય તાલુકાઓમાં અડધા ઇંચથી લઈને અઢી ઇંચ સુધીનો હળવોથી મધ્યમ વરસાદ વરસ્યો છે. સતત વરસી રહેલા વરસાદને કારણે ખેડૂતોમાં ક્યાંક ખુશી તો વધુ પડતા પાણીના કારણે પાક ધોવાઈ જવાની ચિંતા જોવા મળી રહી છે. તંત્ર દ્વારા નીચાણવાળા વિસ્તારોમાં રહેતા લોકોને સાવચેત રહેવાની એડવાઈઝરી જાહેર કરવામાં આવી છે.
