Donald Trump: અમેરિકા અને ઈઝરાયેલ (Israel) દ્વારા કરવામાં આવેલા ભીષણ હુમલા બાદ ઈરાનની હાલત અત્યંત દયનીય બની ગઈ છે. અમેરિકી રાષ્ટ્રપતિ ડોનાલ્ડ ટ્રમ્પ (Donald Trump) એ એક ચોંકાવનારો દાવો કરતા જણાવ્યું છે કે ઈરાન (Iran) ના પરમાણુ ઠેકાણાઓ એટલી હદે તબાહ થઈ ગયા છે કે હવે ત્યાંથી ‘ન્યૂક્લિયર ડસ્ટ’ (Nuclear Dust) એટલે કે રેડિયોએક્ટિવ મટિરિયલ બહાર કાઢવાની ક્ષમતા પણ ઈરાન પાસે રહી નથી.
પરમાણુ સામગ્રી ઊંડે દટાઈ
ફોક્સ ન્યૂઝ (Fox News) ને આપેલા ઈન્ટરવ્યુમાં ટ્રમ્પે ખુલાસો કર્યો હતો કે ખુદ ઈરાની અધિકારીઓએ કબૂલાત કરી છે કે બોમ્બમારો એટલો પ્રચંડ હતો કે પરમાણુ સામગ્રી જમીનમાં ખૂબ જ ઊંડાઈએ દટાઈ ગઈ છે. ઈરાન માટે આ સામગ્રી ફરીથી પ્રાપ્ત કરવી ટેકનિકલી અશક્ય બની ગયું છે. જોકે, અમેરિકા પોતે ત્યાં જઈને આ સફાઈ અભિયાન કેવી રીતે હાથ ધરશે તે હજુ સ્પષ્ટ નથી, પરંતુ ટ્રમ્પે મક્કમતાથી કહ્યું છે કે ઈરાનને કોઈપણ સંજોગોમાં પરમાણુ હથિયાર (Nuclear Weapons) બનાવવા દેવામાં આવશે નહીં.
જનરલોની ટીમ એક્શન મોડમાં
વ્હાઇટ હાઉસ (White House) ના એક કાર્યક્રમ દરમિયાન ટ્રમ્પે ઈરાનને ખુલ્લી ધમકી આપતા જણાવ્યું કે અમેરિકી આર્મી જનરલો (Army Generals) નું એક મોટું ગ્રુપ તેમના આગામી નિર્દેશની રાહ જોઈ રહ્યું છે. આ નિવેદન સ્પષ્ટ સંકેત આપે છે કે જો ઈરાન નમશે નહીં, તો અમેરિકા વધુ સૈન્ય કાર્યવાહી કરતા ખચકાશે નહીં.
શાંતિ પ્રસ્તાવ ફગાવ્યો
નોંધનીય છે કે 28 ફેબ્રુઆરીથી શરૂ થયેલા આ યુદ્ધને સમાપ્ત કરવા માટે ઈરાને રવિવારે એક પ્રસ્તાવ મોકલ્યો હતો. જોકે, ડોનાલ્ડ ટ્રમ્પે આ પ્રસ્તાવને ‘અસ્વીકાર્ય’ કહીને ફગાવી દીધો છે. તેમણે સોશિયલ મીડિયા પ્લેટફોર્મ ટ્રુથ સોશિયલ (Truth Social) પર લખ્યું કે, “મેં ઈરાની પ્રતિનિધિઓનો જવાબ વાંચ્યો, જે મને બિલકુલ પસંદ આવ્યો નથી.” ટ્રમ્પે વધુમાં ઉમેર્યું કે ઈરાન છેલ્લા 50 વર્ષથી અમેરિકા સાથે રમત રમી રહ્યું છે, પરંતુ હવે તેમનો સમય પૂરો થયો છે.
28 ફેબ્રુઆરીના હુમલામાં ઈરાનના સુપ્રીમ લીડર અયાતુલ્લા ખામેનેઈ (Ayatollah Khamenei) સહિત અનેક સૈન્ય નેતાઓ માર્યા ગયા હતા. ત્યારબાદ સમગ્ર મિડલ ઈસ્ટ (Middle East) માં યુદ્ધ ફાટી નીકળ્યું હતું. જોકે 8 એપ્રિલે યુદ્ધવિરામ થયો હતો, પરંતુ હજુ સુધી કોઈ કાયમી શાંતિ સમજૂતી થઈ શકી નથી.
