June 1 Rules Changing: જૂન ૨૦૨૬ (June 2026) ની શરૂઆત સામાન્ય લોકો માટે ઘણા મોટા ફેરફારો સાથે થઈ છે. આજથી દેશમાં એવા કેટલાક નવા નિયમો લાગુ થઈ ગયા છે, જેની સીધી અસર સામાન્ય માણસના ખિસ્સા, ઘરના બજેટ અને રોજિંદી જિંદગી પર પડશે. રસોઈ ગેસથી લઈને ડિજિટલ પેમેન્ટ, બેંકિંગ, ટેક્સ, રેલવે અને ઓટોમોબાઈલ સેક્ટર સુધીના અનેક મહત્વના નિયમો બદલાયા છે. આમાંથી કેટલાક નિયમો સુરક્ષા વધારવા માટે છે, તો કેટલાક ફેરફારોને કારણે મોંઘવારીનો સામનો કરવો પડી શકે છે.
મોંઘવારીનો માર: દૂધ, કાર અને કોમર્શિયલ ગેસના ભાવમાં વધારો
વાહન ખરીદવાનું વિચારી રહેલા લોકો માટે હવે ખિસ્સા વધુ ઢીલા કરવા પડશે. અગ્રણી કાર ઉત્પાદક કંપની મારુતિ સુઝુકી (Maruti Suzuki) એ તેના કેટલાક મોડલ્સ પર રૂ. ૩૦,૦૦૦ સુધીનો વધારો ઝીંક્યો છે, જ્યારે હ્યુન્ડાઈ મોટર ઈન્ડિયા (Hyundai Motor India) એ પણ પોતાના વાહનો મોંઘા કર્યા છે. આ સાથે જ કેરળના પ્રખ્યાત ડેરી બ્રાન્ડ મિલ્મા (Milma) એ દૂધના ભાવમાં પ્રતિ લીટર રૂ. ૪ નો વધારો કર્યો છે. આ ઉપરાંત, તેલ કંપનીઓએ ૧૯ કિલોના કોમર્શિયલ એલપીજી (LPG) સિલિન્ડર અને ૫ કિલોના સિલિન્ડરના ભાવ વધાર્યા છે, જોકે ૧૪.૨ કિલોના ઘરેલું ગેસ સિલિન્ડરના ભાવ યથાવત રાખવામાં આવ્યા છે.
ડિજિટલ પેમેન્ટ અને ટ્રાન્ઝેક્શન બન્યા વધુ સુરક્ષિત
ઓનલાઈન છેતરપિંડી રોકવા માટે યુપીઆઈ (UPI) પેમેન્ટ સિસ્ટમમાં મોટો ફેરફાર કરાયો છે. હવે પૈસા મોકલતા પહેલા સામેવાળી વ્યક્તિ કે વેપારીનું બેંક ખાતામાં નોંધાયેલું અસલી નામ સ્ક્રીન પર દેખાશે. મોટા યુપીઆઈ ટ્રાન્ઝેક્શન પર હવે ફિંગરપ્રિન્ટ કે ફેસ આઈડી (Face ID) જેવા ટુ-સ્ટેપ વેરિફિકેશન ફરજિયાત બનશે. આ સિવાય, સરકારે પાન કાર્ડ (PAN Card) ના નિયમોમાં પણ સુધારો કર્યો છે, જેમાં હાઈ-વેલ્યુ પ્રોપર્ટી ડીલ માટે પાન કાર્ડ અનિવાર્ય કરાયું છે. જે કરદાતાઓનો ટેક્સ રૂ. ૧૦,૦૦૦ થી વધુ છે, તેમણે ૧૫ જૂન સુધીમાં એડવાન્સ ટેક્સ (Advance Tax) નો પ્રથમ હપ્તો ભરવો પડશે.
રેલવે, એરલાઈન્સ અને સોલર પેનલના નિયમોમાં પણ ફેરફાર
મુસાફરો માટે એર ઈન્ડિયા (Air India) અને ઈન્ડિગો (IndiGo) એ કેટલીક ઘરેલું ફ્લાઈટ્સમાં ઘટાડો કર્યો છે, જેનાથી ભાડા મોંઘા થઈ શકે છે. બીજી તરફ, ભારતીય રેલવે (Indian Railways) દ્વારા ટ્રેક અપગ્રેડેશનનું કામ ચાલતું હોવાથી ઘણી ટ્રેનોના રૂટ બદલાયા છે અથવા રદ કરવામાં આવી છે. આ સિવાય, સરકારી સબસિડી વાળા સોલર પ્રોજેક્ટ્સ માટે હવે માત્ર એએલએમએમ (ALMM) ની યાદીમાં સામેલ સોલર મોડ્યુલનો જ ઉપયોગ કરી શકાશે, જેનાથી ક્વોલિટી સુધરશે પરંતુ કિંમતો વધી શકે છે.
