Dwarka News: યાત્રાધામ દ્વારકા (Dwarka) નજીક આવેલા દરિયાકાંઠાના વિસ્તાર રૂપેણ બંદર (Rupen Bandar) ખાતે કાયદો અને વ્યવસ્થાની સ્થિતિ કથળી હોય તેવો એક સનસનાટીભર્યો કિસ્સો સામે આવ્યો છે. અહીં સામાન્ય બાબતે નહીં, પરંતુ જૂની અદાવતનો ખાર રાખીને બે જૂથના લોકો સામસામે આવી ગયા હતા અને જોતજોતામાં સમગ્ર વિસ્તાર રણમેદાનમાં ફેરવાઈ ગયો હતો. આ હિંસક અથડામણને પગલે સ્થાનિક લોકોમાં ભારે ફફડાટ અને ભયનો માહોલ ફેલાઈ ગયો છે.
ધોકા અને પાઇપ વડે સામસામે હુમલો
મળતી માહિતી અનુસાર, રૂપેણ બંદર (Rupen Bandar) ખાતે એકત્રિત થયેલા બંને જૂથના લોકો વચ્ચે પહેલા ઉગ્ર બોલાચાલી અને ગાળાગાળી થઈ હતી. મામલો એટલો બિચક્યો કે બંને પક્ષના લોકો લોખંડની પાઇપો (Iron pipes) અને લાકડાના ધોકા (Wooden sticks) જેવા ઘાતક હથિયારો સાથે એકબીજા પર તૂટી પડ્યા હતા. ધોળા દિવસે જાહેર રસ્તા પર જ બે જૂથના લોકો વચ્ચે હિંસક મારામારી થઈ હતી. આ આખી ઘટના દરમિયાન આસપાસના લોકો મૂકપ્રેક્ષક બનીને જોતા રહ્યા હતા અને કોઈ વચ્ચે પડવાની હિંમત કરી શક્યું ન હતું.
જૂની અદાવત બની હિંસાનું કારણ
પ્રાથમિક વિગતો મુજબ, આ જૂથ અથડામણ પાછળ કોઈ તાત્કાલિક કારણ નહોતું, પરંતુ બંને જૂથ વચ્ચે લાંબા સમયથી ચાલી આવતી જૂની અદાવત (Old Enmity) અને આંતરિક મનદુઃખ જવાબદાર હોવાનું સામે આવ્યું છે. આ અગાઉની દુશ્મનાવટનો બદલો લેવા માટે જ બંને પક્ષો પૂર્વઆયોજિત રીતે હથિયારો સાથે સામસામે આવી ગયા હોવાની આશંકા સેવાઈ રહી છે. મારામારીની આ ઘટનામાં કેટલાક લોકોને નાની-મોટી ઈજાઓ પહોંચી હોવાના પણ અહેવાલ છે.
સમગ્ર ઘટનાનો વિડીયો સોશિયલ મીડિયામાં વાયરલ
આ ચકચારી મારામારીની ઘટના સમયે ત્યાં હાજર કોઈ સ્થાનિક નાગરિકે પોતાના મોબાઈલ કેમેરામાં આખો વીડિયો કેદ કરી લીધો હતો. હાલમાં આ હિંસક મારામારીનો લાઈવ વિડીયો (Viral Video) સોશિયલ મીડિયા પ્લેટફોર્મ પર ખૂબ જ વાયરલ થઈ રહ્યો છે. વાયરલ વીડિયોમાં સ્પષ્ટ જોઈ શકાય છે કે કઈ રીતે કાયદાના ડર વગર લોકો એકબીજા પર પાઇપ અને ધોકા ઉગામી રહ્યા છે. આ વીડિયો વાયરલ થતાં જ સ્થાનિક પોલીસ (Police) હરકતમાં આવી છે અને વીડિયોના આધારે તોફાની તત્વોની ઓળખ કરી તેમની સામે કાયદેસરની કાર્યવાહી હાથ ધરવા ચક્રો ગતિમાન કર્યા છે.
