Bollywood Remake Films: એક સમય હતો જ્યારે બૉલીવુડ (Bollywood) પોતાની અનોખી અને દમદાર વાર્તાઓ માટે આખી દુનિયામાં જાણીતું હતું. દર્શકો દર શુક્રવારે સિનેમાઘરોમાં કંઈક નવું જોવાની આશા સાથે જતા હતા. પરંતુ છેલ્લા એક દાયકામાં બૉલીવુડની આખી તસવીર બદલાઈ ગઈ છે. ઓરિજિનલ સ્ક્રિપ્ટ પર મહેનત કરવાને બદલે બૉલીવુડના મોટા પ્રોડ્યુસર્સ અને સ્ટુડિયોએ દક્ષિણ ભારતીય (South Indian) અને હોલીવુડ (Hollywood) ની હિટ ફિલ્મોની રિમેક (Remake) બનાવવાનું શરૂ કર્યું. શરૂઆતમાં આ ફોર્મ્યુલા ઘણો સફળ રહ્યો. ‘ગજની’ (Ghajini), ‘વાન્ટેડ’ (Wanted), ‘સિંઘમ’ (Singham), ‘કબીર સિંહ’ (Kabir Singh) અને ‘સિમ્બા’ (Simmba) જેવી ફિલ્મોએ બોક્સ ઓફિસ (Box Office) પર કમાણીના તમામ રેકોર્ડ તોડી નાખ્યા હતા. તેનાથી મેકર્સને લાગ્યું કે હિટ વાર્તાને નવા સ્ટાર્સ સાથે રજૂ કરવી એ જ સફળતાની શોર્ટકટ ગેરંટી છે.
ઓટીટી પ્લેટફોર્મ્સે બદલ્યો આખો ખેલ
પરંતુ કોરોના મહામારી (Corona Pandemic) પછી પરિસ્થિતિ સંપૂર્ણપણે બદલાઈ ગઈ છે. ઓટીટી (OTT) પ્લેટફોર્મ્સના આગમનથી ભાષાની દીવાલો તૂટી ગઈ છે. હવે દર્શકો તમિલ (Tamil), તેલુગુ (Telugu), મલયાલમ (Malayalam) કે અન્ય ભાષાઓની ઓરિજિનલ ફિલ્મો રિલીઝ થતાંની સાથે જ ઘરે બેઠા હિન્દી સબટાઈટલ કે ડબિંગ સાથે જોઈ લે છે. આવામાં જ્યારે એ જ વાર્તા બે-ત્રણ વર્ષ પછી હિન્દી રિમેક તરીકે થિયેટરોમાં આવે છે, ત્યારે દર્શકો માટે તેમાં કોઈ નવીનતા કે ઉત્સાહ બાકી રહેતો નથી. છેલ્લા પાંચ વર્ષમાં બૉલીવુડમાં બનેલી 25 રિમેક ફિલ્મોમાંથી 23 ફિલ્મો બોક્સ ઓફિસ પર ખરાબ રીતે ફ્લોપ થઈ છે, જે સ્ક્રિપ્ટના ગંભીર સંકટને દર્શાવે છે.
મોટા સ્ટાર્સ પણ રિમેકને ન બચાવી શક્યા
વર્ષ 2૦2૧ થી 2૦25 દરમિયાન બૉલીવુડના મોટા સુપરસ્ટાર્સે રિમેક ફિલ્મો પર મોટો દાવ લગાવ્યો હતો. આ યાદીમાં ‘તડપ’ (Tadap), ‘બચ્ચન પાંડે’ (Bachchhan Paandey), ‘જર્સી’ (Jersey), ‘લાલ સિંહ ચડ્ડા’ (Laal Singh Chaddha), ‘વિક્રમ વેધા’ (Vikram Vedha), ‘શહઝાદા’ (Shehzada), ‘સેલ્ફી’ (Selfiee), ‘ભોલા’ (Bholaa), ‘સરફિરા’ (Sarfira), ‘બેબી જોન’ (Baby John) અને ‘દેવા’ (Deva) જેવી ફિલ્મોનો સમાવેશ થાય છે. આ બધી ફિલ્મોમાં સ્ટાર પાવર હોવા છતાં, તે દર્શકોને આકર્ષવામાં નિષ્ફળ રહી અને પોતાની પડતર કિંમત પણ વસૂલ કરી શકી નહીં. જોકે, ‘દ્રશ્યમ 2’ (Drishyam 2) અને ‘શૈતાન’ (Shaitaan) જેવી ફિલ્મો સફળ રહી, પરંતુ તેની પાછળનું કારણ માત્ર રિમેક હોવું નહીં, પણ મજબૂત સ્ક્રીનપ્લે અને શાનદાર અભિનય હતો.
સોશિયલ મીડિયાની તીવ્ર સરખામણી અને ઓરિજિનલ વાર્તાઓ તરફ ઝુકાવ
આજના સમયમાં સોશિયલ મીડિયા (Social Media) પણ રિમેક ફિલ્મો માટે મુશ્કેલી સાબિત થઈ રહ્યું છે. કોઈપણ ફિલ્મનું ટ્રેલર રિલીઝ થતાંની સાથે જ યુટ્યુબ (YouTube) પર ઓરિજિનલ વિરુદ્ધ રિમેકના વીડિયો વાયરલ થઈ જાય છે. દર્શકો તરત જ કહી દે છે કે ઓરિજિનલ ફિલ્મ વધુ સારી હતી, જેની સીધી અસર ટિકિટના વેચાણ પર પડે છે. બીજી તરફ, ’12th ફેલ’ (12th Fail), ‘મુંજ્યા’ (Munjya) અને ‘સ્ત્રી’ (Stree) જેવી મર્યાદિત બજેટની ઓરિજિનલ ફિલ્મોએ બોક્સ ઓફિસ પર ધૂમ મચાવી દીધી. હવે બૉલીવુડના ફિલ્મમેકર્સ અને ટ્રેડ એક્સપર્ટ્સ (Trade Experts) પણ સ્વીકારી રહ્યા છે કે માત્ર રિમેકના ભરોસે ઈન્ડસ્ટ્રી ન ચાલી શકે, દર્શકોને હવે નવો અનુભવ અને નવી વાર્તાઓ જોઈએ છે.
