Ambalal Patel: ગુજરાતના જાણીતા હવામાન વિશ્લેષક અંબાલાલ પટેલે (Ambalal Patel) ગઈકાલે લીધેલા પોતાના આશ્ચર્યજનક નિર્ણયને બદલીને આજે ફરી એકવાર જાહેરાત કરી છે કે તેઓ ખેડૂતો અને સામાન્ય જનતાના હિત માટે હવામાનની આગાહી કરવાનું ચાલુ રાખશે. ગઈકાલે તેમણે આગાહીઓ ન કરવાનો નિર્ણય જાહેર કર્યો હતો, જેનાથી તેમના અનુયાયીઓ અને ખાસ કરીને રાજ્યના ખેડૂતોમાં ચિંતા વ્યાપી ગઈ હતી. જોકે, આજે તેમણે સ્પષ્ટ કર્યું છે કે જનતાના કલ્યાણને ધ્યાનમાં રાખીને તેઓ પોતાની આ સેવા અટકાવશે નહીં.
જાથાની ચીમકી બાદ સર્જાયો હતો વિવાદ
આ સમગ્ર વિવાદની શરૂઆત ત્યારે થઈ જ્યારે વિજ્ઞાન જાથાના (Vigyan Jatha) પ્રમુખ જયંત પંડ્યાએ (Jayant Pandya) અંબાલાલ પટેલ વિરુદ્ધ કાયદાકીય પગલાં લેવાની ચીમકી આપી હતી. જાથા દ્વારા કરાયેલા આ વિરોધ અને કાનૂની કાર્યવાહીની ધમકી બાદ વિવાદ વકર્યો હતો, જેનાથી વ્યથિત થઈને અંબાલાલ પટેલે નવો વળાંક લેતા હવામાનની આગાહીઓ કાયમ માટે બંધ કરી દેવાની જાહેરાત કરી દીધી હતી. જોકે, ચોમાસાની સીઝન વચ્ચે આ પ્રકારનો નિર્ણય ખેડૂતો માટે મોટો ફટકો માનવામાં આવી રહ્યો હતો.
પરંપરાગત જ્ઞાન અને સેવાનો દાવો
આજે મીડિયા સમક્ષ પોતાના નિર્ણયની ફેરવિચારણા અંગે વાત કરતા અંબાલાલ પટેલે જણાવ્યું હતું કે, તેઓ આ હવામાનની આગાહીઓ પાછળ કોઈ પણ પ્રકારનો આર્થિક કે નાણાકીય લાભ મેળવતા નથી. આ એક નિઃસ્વાર્થ લોકસેવા છે. તેમણે ઉમેર્યું કે, “અમે સદીઓ જૂના પરંપરાગત જ્ઞાન અને નક્ષત્રોની ગણતરીના આધારે વરસાદ તથા વાવાઝોડાની આગાહી કરીએ છીએ. અમારો હેતુ કોઈને ગેરમાર્ગે દોરવાનો નથી, પરંતુ ખેડૂતોને તેમના પાકના રક્ષણ માટે અગાઉથી ચેતવવાનો છે.”
કાયદાકીય બાબતો અંગે આપી સ્પષ્ટતા
કાનૂની નડતર અંગે વાત કરતા તેમણે મક્કમતાપૂર્વક જણાવ્યું કે, તેઓ કોઈની પાસેથી કોઈ ફી કે આર્થિક લાભ લેતા નથી, તેથી તેમના પર આ પ્રકારે કાયદાકીય પગલાં લઈ શકાય નહીં. તેમ છતાં, ભવિષ્યમાં કોઈપણ ગૂંચવણથી બચવા માટે તેઓ આગામી સમયમાં કાયદાકીય બાબતોનું સંપૂર્ણ જ્ઞાન અને માર્ગદર્શન પણ મેળવશે. આ જાહેરાત બાદ ગુજરાતના (Gujarat) લાખો ખેડૂતોએ રાહતનો શ્વાસ લીધો છે, કારણ કે ગ્રામીણ વિસ્તારોમાં ખેતીના આયોજન માટે અંબાલાલની આગાહીઓ ખૂબ મહત્વની માનવામાં આવે છે.
