Ahmedabad Crime News: સભ્ય સમાજને હચમચાવી મૂકે તેવી એક ચોંકાવનારી ઘટના અમદાવાદના વટવા (Vatva) વિસ્તારમાંથી સામે આવી છે. અહીં માત્ર થોડા રૂપિયાની ઉઘરાણી અને લાલચમાં એક નવજાત બાળકીનો સોદો કરી દેવામાં આવ્યો હોવાનો સળગતો મામલો પ્રકાશમાં આવ્યો છે. આ સમગ્ર ઘટના અંગે વટવા પોલીસ સ્ટેશન (Vatva Police Station) માં ભારતીય ન્યાય સંહિતા (BNS) હેઠળ ગુનો નોંધીને કાયદેસરની કાર્યવાહી હાથ ધરવામાં આવી છે. પોલીસે આ અમાનવીય કૃત્યમાં સામેલ મુખ્ય આરોપી મહિલા સહિત કુલ ચાર મહિલાઓની ધરપકડ કરી લીધી છે.
રિક્ષા ખરીદવા લીધેલી લોન બની મજબૂરી
આ કેસની વિગત એવી છે કે, ભોગ બનનાર ફરિયાદી દંપતીએ પોતાની આજીવિકા ચલાવવા માટે એક રિક્ષા ખરીદવાનું નક્કી કર્યું હતું. આ રિક્ષા લેવા માટે તેમણે એક આરોપી મહિલા પાસેથી રૂ. 1 લાખ ઉધાર લીધા હતા. જો કે, આર્થિક સંકડામણને કારણે દંપતી સમયસર પૈસા પાછા ચૂકવી શક્યું નહોતું. પૈસાની ઉઘરાણી દરમિયાન આરોપી મહિલાએ દંપતીની લાચારીનો ફાયદો ઉઠાવવાનું કાવતરું ઘડ્યું હતું. તેણે દંપતીને ધમકાવવા કે દબાણ કરવાને બદલે એક અજીબ લાલચ આપી કે, “જો તમારી પાસે અત્યારે પૈસા ન હોય તો તમારી નવજાત બાળકી મને આપી દો.”
વધુ પૈસાની લાલચ અને બાળકીનું અપહરણ
આરોપી મહિલા એટલેથી જ ન અટકી, તેણે દંપતીને બાળકીના બદલામાં દેવું માફ કરવા ઉપરાંત વધુ રૂ. 1 લાખ આપવાની પણ ઓફર કરી હોવાનો આક્ષેપ ફરિયાદમાં કરવામાં આવ્યો છે. દરમિયાન, એક દિવસ આરોપી મહિલા આ દંપતીના ઘરે આવી હતી અને નવજાત બાળકીને રમાડવાના બહાને વિશ્વાસમાં લઈ પોતાના ઘરે લઈ ગઈ હતી. જ્યારે માતા-પિતાએ પોતાની દીકરી પરત માંગી, ત્યારે આરોપી મહિલાએ ચોંકાવનારો ખુલાસો કરતા કહ્યું કે, “મેં બાળકીને વેચી દીધી છે અને તે એક સારા ઘરમાં છે, હવે તે પાછી નહીં મળે.” આ સાંભળીને માતા-પિતાના પગ નીચેથી જમીન સરકી ગઈ હતી.
પોલીસ ફરિયાદની ધમકી આપતા બાળકી પરત કરી
પોતાનું વહાલસોયું બાળક ગુમાવી ચૂકેલા દંપતીએ આખરે હિંમત ભેગી કરી પોલીસમાં જવાનું નક્કી કર્યું. જ્યારે તેમણે આરોપી મહિલાને પોલીસ ફરિયાદ કરવાની કડક શબ્દોમાં ચેતવણી આપી, ત્યારે આરોપીઓ ગભરાઈ ગયા હતા. કાનૂની સકંજામાં ફસાવાના ડરથી, આરોપી મહિલાએ બીજા જ દિવસે બાળકીને તેના માતા-પિતાને હેમખેમ પરત સોંપી દીધી હતી. જો કે, મામલો અત્યંત ગંભીર હોવાથી બાળકીની માતાએ વટવા પોલીસ સ્ટેશન (Vatva Police Station) માં જઈને આખી આપવીતી જણાવી ન્યાયની માંગ કરી હતી.
ચાર મહિલાઓની ધરપકડ અને તપાસનો ધમધમાટ
માતાની ફરિયાદના આધારે વટવા પોલીસે ત્વરિત પગલાં ભરીને કાયદેસરનો ગુનો દાખલ કર્યો હતો. પોલીસે બાળકીના ગેરકાયદેસર વેચાણ અને આ ખરીદ-વેચાણના સોદામાં સંડોવણીના આરોપસર મુખ્ય આરોપી મહિલા, બાળકીને ખરીદનાર મહિલા તેમજ આ સમગ્ર સોદામાં મધ્યસ્થી તરીકે મદદ કરનારી મહિલાઓ સહિત કુલ ચાર મહિલાઓની ધરપકડ કરી લીધી છે. આ રેકેટમાં અન્ય કોઈ લોકો સામેલ છે કે કેમ, અને અગાઉ પણ આવા કોઈ સોદા થયા છે કે નહીં તે દિશામાં વટવા પોલીસ (Vatva Police) હાલમાં વધુ તપાસ ચલાવી રહી છે.
