Chhota Udepur: ગુજરાતમાં સરકારી તંત્રની બેદરકારીના કારણે નિર્દોષ નાગરિકો અને બાળકોએ જીવ ગુમાવવો પડ્યો હોય તેવી અનેક ઘટનાઓ સામે આવતી રહે છે. આવી જ એક અત્યંત હૃદયદ્રાવક અને આઘાતજનક ઘટના છોટાઉદેપુર જિલ્લાના કવાંટ (Kwant) તાલુકાના મોટી ઝડુલી (Moti Zadhuli) ગામેથી સામે આવી છે. અહીં પાણી પુરવઠા વિભાગની (Water Supply Department) ગંભીર બેદરકારીના કારણે બે માસૂમ બાળકીઓએ પોતાનો જીવ ગુમાવવો પડ્યો છે. આ ઘટનાને પગલે સમગ્ર પંથકમાં ભારે અરેરાટી વ્યાપી ગઈ છે અને સ્થાનિક ગ્રામજનોમાં વહીવટી તંત્ર સામે રોષ ફાટી નીકળ્યો છે.
રમતા રમતા પાણીના ખાડામાં ખાબકી બાળકીઓ
મળતી વિગતો અનુસાર, મોટી ઝડુલી ગામમાંથી પસાર થતી પાણીની મુખ્ય પાઇપલાઇનમાં (Pipeline) લાંબા સમયથી લીકેજ (Leakage) હતું. આ લીકેજના કારણે આસપાસના વિસ્તારમાં પાણીનો મોટો ખાડો ભરાઈ ગયો હતો. તંત્ર દ્વારા આ લીકેજ સમયસર સરખું કરવામાં આવ્યું ન હતું, જે અંતે કાળ સાબિત થયું. ગામમાં રહેતી બે માસૂમ બાળકીઓ ઘર નજીક રમી રહી હતી. રમતા રમતા બંને બાળકીઓ અચાનક આ લીકેજના કારણે પાણીથી ભરાયેલા ઊંડા ખાડામાં પડી ગઈ હતી. ખાડામાં પાણી વધુ હોવાના કારણે બંને બાળકીઓ તેમાં ડૂબી ગઈ હતી.
પરિવારે ગુમાવ્યો ઘરનો ચિરાગ: ગામમાં શોકનો માહોલ
બાળકીઓ લાંબા સમય સુધી ન દેખાતા પરિવારજનોએ તેમની શોધખોળ શરૂ કરી હતી. અંતે પાઇપલાઇનના પાણીથી ભરાયેલા ખાડામાંથી બંને બાળકીઓના મૃતદેહ મળી આવ્યા હતા. મૃતક બાળકીઓની ઓળખ નીરુમતિ ભીલ (Nirumati Bhil) અને મીનાક્ષી ભીલ (Minakshi Bhil) તરીકે થઈ છે. એકસાથે બે બાળકીઓના મોતના સમાચાર વાયુવેગે ગામમાં પ્રસરતા જ મોટી સંખ્યામાં લોકો ઘટનાસ્થળે ઉમટી પડ્યા હતા. માસૂમ દીકરીઓના મોતના પગલે પરિવાર પર આભ તૂટી પડ્યું છે અને તેમના આક્રંદથી વાતાવરણ ગમગીન બની ગયું છે. ગ્રામજનોનો આક્ષેપ છે કે જો પાણી પુરવઠા વિભાગે સમયસર પાઇપલાઇનનું લીકેજ બંધ કર્યું હોત અથવા ત્યાં સુરક્ષા માટે કોઈ આડશ મૂકી હોત તો આજે આ બંને બાળકીઓ જીવતી હોત. સ્થાનિકોએ આ મામલે જવાબદાર અધિકારીઓ સામે કડકમાં કડક પગલાં ભરવાની માંગ કરી છે.
