No Wheat Diet Trend: ભારતીય ભોજનમાં ઘઉંનો લોટ (Wheat Flour) એક અત્યંત મહત્વનો હિસ્સો છે. સવારના પરાઠાથી લઈને રાતની રોટલી સુધી, મોટાભાગની વાનગીઓ ઘઉંના લોટમાંથી જ બને છે. જો કે, આજકાલ સોશિયલ મીડિયા પર ‘નો વ્હીટ ફ્લોર’ (No Wheat Flour) એટલે કે ઘઉંનો લોટ ન ખાવાનો ટ્રેન્ડ ખૂબ જ ઝડપથી ચાલી રહ્યો છે. ફિટનેસ ફ્રીક લોકો હવે ઘઉંના લોટને પોતાની ડાયટમાંથી બહાર કરી રહ્યા છે. તેમનું માનવું છે કે ઘઉં ખાવાથી સ્થૂળતા (Obesity) વધે છે અને સ્વાસ્થ્ય સંબંધિત અનેક સમસ્યાઓ ઊભી થાય છે. પરંતુ શું ખરેખર ઘઉંનો લોટ બીમારીઓનું જોખમ વધારે છે?
શું કહે છે ફોર્ટિસના નિષ્ણાત ડૉક્ટર?
આ સવાલનો સાચો જવાબ આપતા એક્સપર્ટ જણાવે છે કે, ઘઉંનો લોટ દરેક વ્યક્તિ માટે નુકસાનકારક નથી. પરંતુ હા, જો તેનું ખોટી માત્રામાં અથવા ખોટી રીતે સેવન કરવામાં આવે તો શરીરને આડઅસર (Side Effects) થઈ શકે છે. ઘઉં એ એક કોમ્પ્લેક્સ કાર્બોહાઇડ્રેટ (Complex Carbohydrate) છે, જેમાં ગ્લુટેન (Gluten) ની માત્રા વધારે હોય છે. આથી જે લોકો ગ્લુટેન-ફ્રી ડાયટ ફોલો કરે છે, તેમણે ઘઉં ખાવાથી બચવું જોઈએ.
રોજ ઘઉંની રોટલી ખાવાના નુકસાન
એક્સપર્ટના મતે, જો તમે દરરોજ માત્ર ઘઉંના લોટની રોટલી ખાતા હોવ તો તે નુકસાનકારક સાબિત થઈ શકે છે. રોજ ઘઉં ખાવાથી શરીરમાં અચાનક શુગર સ્પાઈક (Sugar Spike) એટલે કે બ્લડ શુગરનું સ્તર ઝડપથી વધી શકે છે. લાંબા ગાળે આ આદત વજન વધારવા અને ફેટી લિવર (Fatty Liver) જેવી ગંભીર સમસ્યાઓનું કારણ બની શકે છે.
ઘઉંના લોટનો ઉપયોગ કેવી રીતે કરવો?
એક્સપર્ટના મતે, ઘઉંના લોટને ડાયટમાંથી સંપૂર્ણપણે હટાવવાની કોઈ જરૂર નથી. તમે તેની માત્રા ઓછી કરી શકો છો અથવા તો તેને અન્ય લોટ સાથે મિક્સ કરીને ખાઈ શકો છો. આમ કરવાથી તેનો ગ્લાયસેમિક ઇન્ડેક્સ (Glycemic Index) ઓછો થઈ જાય છે.
ડાયાબિટીસના દર્દીઓ માટે: ઘઉંના લોટ સાથે જુવાર (Jowar) નો લોટ મિક્સ કરીને ખાવો જોઈએ.
પ્રોટીન વધારવા માટે: ડાયટમાં પ્રોટીનની માત્રા વધારવા માટે ઘઉંમાં બાજરી (Bajra) નો લોટ ભેળવવો ફાયદાકારક છે.
આયર્નની કમી દૂર કરવા: જો શરીરમાં આયર્નની ઉણપ હોય, તો રાગી (Ragi) નો લોટ શ્રેષ્ઠ વિકલ્પ છે.
આ ત્રણેય અનાજ પોષક તત્વોથી ભરપૂર છે, જે વજન ઘટાડવાની સાથે આયર્ન અને પ્રોટીનની ઉણપ પણ દૂર કરે છે.
