ગુજરાત વિધાનસભાના બજેટ સત્રમાં ઉપાધ્યક્ષ પદની ચૂંટણી થવાની શક્યતા: કોંગ્રેસ પણ મેદાનમાં ઉતરે તેવી સંભાવના

BJP vs Congress: 16મી ફેબ્રુઆરીથી ગુજરાત વિધાનસભાનું બજેટ સત્ર શરૂ થવા જઈ રહ્યું છે ત્યારે રાજકીય ગરમાવો તેજ બન્યો છે. સૂત્રોના જણાવ્યા અનુસાર, આ સત્ર દરમિયાન વિધાનસભાના ઉપાધ્યક્ષની ચૂંટણી પ્રક્રિયા હાથ ધરાય તેવી પ્રબળ શક્યતા છે. જોકે ભાજપ પાસે સ્પષ્ટ બહુમતી છે, તેમ છતાં કોંગ્રેસે સંકેત આપ્યા છે કે તેઓ આ પદ માટે પોતાનો ઉમેદવાર મેદાનમાં ઉતારશે.

જેઠા ભરવાડના રાજીનામાથી ખાલી પડેલી જગ્યા
તાજેતરમાં જ જેઠા ભરવાડે અચાનક રાજીનામું આપતા ઉપાધ્યક્ષની બેઠક ખાલી પડી છે. ભાજપ હાઈકમાન્ડે આ પદ માટે યોગ્ય ઉમેદવારની શોધખોળ શરૂ કરી દીધી છે. શક્યતા છે કે ગૃહનું સંચાલન કુશળતાપૂર્વક કરી શકે તેવા કોઈ સિનિયર ધારાસભ્યની આ પદ માટે પસંદગી કરવામાં આવશે. આગામી એક અઠવાડિયામાં ઉપાધ્યક્ષની સાથે બે નાયબ દંડકોના નામ પણ સ્પષ્ટ થઈ શકે છે.

ભાજપમાં પસંદગીની પ્રક્રિયા તેજ
જેઠાભાઈ ભરવાડના રાજીનામા બાદ ખાલી પડેલી આ બેઠક માટે ભાજપ હાઈકમાન્ડે લીલી ઝંડી આપી દીધી છે. સૂત્રોના જણાવ્યા અનુસાર, ગૃહનું સંચાલન કરી શકે તેવા કોઈ સિનિયર ધારાસભ્યને ભાજપ આ પદ માટે પસંદ કરી શકે છે. આગામી એક અઠવાડિયામાં જ ઉપાધ્યક્ષ તેમજ બે નાયબ દંડકની નિમણૂક અંગેનું ચિત્ર સ્પષ્ટ થઈ જશે.

વિપક્ષની માંગ: ‘ઉપાધ્યક્ષ પદ વિપક્ષને ફાળવો’
ગુજરાત વિધાનસભામાં ઉપાધ્યક્ષના પદને લઈને રાજકીય માહોલ ગરમાયો છે. વિપક્ષના નેતા તુષાર ચૌધરીએ વિધાનસભા અધ્યક્ષને એક ખાસ પત્ર લખીને આગ્રહ કર્યો છે કે, લોકશાહીની ગરિમા જાળવવા માટે ઉપાધ્યક્ષનું પદ વિપક્ષને ફાળવવાની જૂની અને સ્થાપિત પ્રણાલિકાને ફરીથી શરૂ કરવામાં આવે.

તુષાર ચૌધરીએ પોતાના પત્રમાં ભૂતકાળના ઉદાહરણો ટાંકીને જણાવ્યું હતું કે, અગાઉ જ્યારે કોંગ્રેસની સરકાર હતી ત્યારે પક્ષે હકારાત્મક અને ઉદાર અભિગમ દાખવીને આ મહત્વનું પદ વિપક્ષના ફાળે આપ્યું હતું. જોકે, છેલ્લા કેટલાક સમયથી આ સ્વસ્થ પરંપરા તૂટી હોવાનું જણાય છે. તેમણે ભારપૂર્વક જણાવ્યું હતું કે, તંદુરસ્ત લોકશાહીના હિતમાં આ પરંપરાનું પુનઃસ્થાપન થવું અત્યંત અનિવાર્ય છે.

હવે રાજકીય વર્તુળોમાં એ ચર્ચાનો વિષય બન્યો છે કે, સત્તારૂઢ ભાજપ સરકાર વિપક્ષની આ રજૂઆતને ગ્રાહ્ય રાખીને નમૂનો પેશ કરશે કે પછી પોતાની પસંદગીના જ કોઈ વ્યક્તિને આ પદ પર નિયુક્ત કરશે. વિપક્ષની આ માંગણી બાદ હવે આગામી દિવસોમાં સરકારના નિર્ણય પર સૌની મીટ મંડાયેલી છે.

ચૂંટણી થવાના સંકેતો
જોકે, સંખ્યાબળની દ્રષ્ટિએ ભાજપ મજબૂત સ્થિતિમાં હોવા છતાં, કોંગ્રેસે સંકેત આપ્યા છે કે તેઓ મેદાન છોડશે નહીં. ભલે સંખ્યાબળ ઓછું હોય, પણ કોંગ્રેસ પોતાના ઉમેદવારને મેદાનમાં ઉતારીને ચૂંટણી લડવાના મૂડમાં છે. હવે જોવાનું એ રહેશે કે ભાજપ પરંપરાગત રીતે વિપક્ષને તક આપે છે કે પછી પોતાના જ ઉમેદવારને ઉતારીને બહુમતીના જોરે આ પદ કબજે કરે છે.