12 February Bank Strike: આગામી 12 ફેબ્રુઆરી, 2026 (ગુરુવાર) ના રોજ દેશની અગ્રણી બેંક યુનિયનોએ રાષ્ટ્રવ્યાપી હડતાળનું આહવાન કર્યું છે. આ એલાનને પગલે બેંકિંગ સેવાઓનો ઉપયોગ કરતા કરોડો ગ્રાહકોમાં અસમંજસની સ્થિતિ પેદા થઈ છે કે તે દિવસે બેંકો ખુલ્લી રહેશે કે બંધ. ખાસ કરીને બેંક ઓફ બરોડાએ સ્ટોક એક્સચેન્જ (BSE) ને આ હડતાળથી થનારી સંભવિત અસરો અંગે સત્તાવાર જાણકારી આપી દીધી છે.
કેમ થઈ રહી છે હડતાળ? શું છે મુખ્ય કારણો?
આગામી 12 ફેબ્રુઆરીના રોજ યોજાનારી રાષ્ટ્રવ્યાપી હડતાળમાં ઓલ ઈન્ડિયા બેંક એમ્પ્લોઈઝ એસોસિએશન (AIBEA), ઓલ ઈન્ડિયા બેંક ઓફિસર્સ એસોસિએશન (AIBOA) અને બેંક એમ્પ્લોઈઝ ફેડરેશન ઓફ ઈન્ડિયા (BEFI) જેવા અગ્રણી સંગઠનો જોડાઈ રહ્યા છે. આ હડતાળ પાછળનું મુખ્ય કારણ કેન્દ્ર સરકાર દ્વારા જાહેર કરાયેલા ચાર નવા શ્રમ સંહિતાઓ (Labor Codes) નો વિરોધ છે, જે વર્તમાન 29 શ્રમ કાયદાઓનું સ્થાન લેવાના છે.
બેંક યુનિયનોના આક્ષેપ મુજબ, આ પ્રસ્તાવિત લેબર કોડ સંપૂર્ણપણે શ્રમિક વિરોધી છે અને તેમાં ટ્રેડ યુનિયનોના રજીસ્ટ્રેશન માટે અત્યંત કડક શરતો રાખવામાં આવી છે. આ ઉપરાંત, કર્મચારીઓ લાંબા સમયથી ‘વર્ક લાઈફ બેલેન્સ’ જાળવવા માટે અઠવાડિયામાં માત્ર પાંચ દિવસ કામકાજ (5-Day Work Week) કરવાની જૂની માંગ પર પણ ભાર મૂકી રહ્યા છે.
શું 12 ફેબ્રુઆરીએ બેંકો ખરેખર બંધ રહેશે?
આગામી 12 ફેબ્રુઆરીએ બેંકોમાં રજા રહેશે કે કેમ તે અંગે ગ્રાહકોમાં મૂંઝવણ જોવા મળી રહી છે, ત્યારે મહત્વની સ્પષ્ટતા એ છે કે ભારતીય રિઝર્વ બેંક (RBI) અથવા અન્ય કોઈ મોટી બેંક દ્વારા આ દિવસે કોઈ સત્તાવાર રજા જાહેર કરવામાં આવી નથી, જેના કારણે ટેકનિકલી બેંકો ખુલ્લી જ રહેશે. જોકે, વિવિધ બેંક યુનિયનો દ્વારા જાહેર કરવામાં આવેલી હડતાળને કારણે બેંકિંગ કામકાજ પર વ્યાપક અસર પડવાની શક્યતા છે.
બેંક ઓફ બરોડાએ આ અંગે સ્ટોક એક્સચેન્જ (BSE) ને લેખિતમાં જાણ કરી છે કે જો કર્મચારીઓ મોટી સંખ્યામાં હડતાળ પર ઉતરશે, તો શાખાઓ અને કચેરીઓના વહીવટી કાર્યમાં વિક્ષેપ પડી શકે છે અને કામકાજ પ્રભાવિત થઈ શકે છે. બીજી તરફ, બેંક સત્તાધીશોએ ગ્રાહકોને ખાતરી આપી છે કે હડતાળના દિવસે પણ બેંકિંગ સેવાઓ સુરુચિપૂર્ણ રીતે ચાલુ રહે તે માટે તમામ જરૂરી આગોતરા પગલાં લેવામાં આવી રહ્યા છે.
ગ્રાહકો માટે એડવાઈઝરી
જો તમારે 12 ફેબ્રુઆરીએ બેંકિંગ સંબંધિત કોઈ મહત્વનું કામ હોય, તો તેને અગાઉથી પતાવી લેવું હિતાવહ છે. હડતાળને કારણે ચેક ક્લિયરન્સ, કેશ ડિપોઝિટ અને અન્ય કાઉન્ટર સેવાઓમાં વિલંબ થઈ શકે છે. જોકે, ડિજિટલ બેંકિંગ અને ATM સેવાઓ કાર્યરત રહેવાની શક્યતા છે.
