Ahmedabad Crime News : અમદાવાદમાં ઓનલાઈન જાહેરાતોના માધ્યમથી થતી છેતરપિંડીના કિસ્સાઓ સતત વધી રહ્યા છે. આવો જ એક કિસ્સો વેજલપુર વિસ્તારમાં સામે આવ્યો છે, જ્યાં ફેસબુક પર મકાન વેચાણની જાહેરાત જોઈને મકાન ખરીદવા ગયેલા એક યુવકે પોતાની જીવનભરની મૂડી સમાન પીએફ ફંડ અને અન્ય મકાન વેચીને ભેગા કરેલા 10 લાખ રૂપિયા ગુમાવવાનો વારો આવ્યો છે. મકાન માલિકે પૈસા લીધા બાદ દસ્તાવેજ કરી આપવાની આનાકાની કરતા આખરે યુવકે વાસણા પોલીસ સ્ટેશનમાં ફરિયાદ નોંધાવી છે.
પોલીસ સૂત્રોના જણાવ્યા અનુસાર, વેજલપુરમાં રહેતા અને વોડાફોન હાઉસમાં નોકરી કરતા મયુર મહેતાને તેમનું હાલનું મકાન નાનું પડતું હોવાથી તેઓ મોટા મકાનની શોધમાં હતા. આ દરમિયાન તેમણે ફેસબુક પર શ્રેયસ એપાર્ટમેન્ટમાં એક મકાન વેચાણની જાહેરાત જોઈ હતી. જાહેરાતના આધારે મયુરભાઈએ સંપર્ક કરતા મિતેશ નામની વ્યક્તિ સાથે વાત થઈ હતી. મિતેશે જણાવ્યું હતું કે મકાન તેની માતાના નામે છે અને તેની કિંમત 20.50 લાખ રૂપિયા નક્કી કરવામાં આવી હતી.
સોદો નક્કી થયા મુજબ, મયુરભાઈએ શરૂઆતમાં 50,000 રૂપિયા બાનાખત પેટે અને ત્યારબાદ ટુકડે-ટુકડે 4 લાખ રૂપિયા ચૂકવ્યા હતા. બાકીના 16 લાખ રૂપિયા જુલાઈ 2025 સુધીમાં આપવાનું નક્કી થયું હતું. જોકે, એપ્રિલ 2024માં મિતેશે ફોન કરીને દિવાળી પહેલા પૈસા ચૂકવી દેવા દબાણ કર્યું હતું. મયુરભાઈ પાસે સગવડ ન હોવા છતાં, મકાન હાથમાંથી ન જાય તે માટે તેમણે પોતાના પીએફ એકાઉન્ટમાંથી પૈસા ઉપાડ્યા અને સરખેજ ખાતે આવેલું પોતાનું બીજું મકાન પણ વેચી દીધું હતું. આમ કુલ મળીને તેમણે 5.50 લાખ રૂપિયા ઓનલાઈન ટ્રાન્સફર કર્યા હતા. અત્યાર સુધીમાં મયુરભાઈએ કુલ 10 લાખ રૂપિયા મિતેશને ચૂકવી દીધા હતા.
મયુરભાઈએ બાકીના 10.50 લાખ રૂપિયા આપવાની તૈયારી દર્શાવી મકાનનો દસ્તાવેજ કરી આપવા જણાવ્યું ત્યારે મિતેશનું વલણ બદલાઈ ગયું હતું. મિતેશ અલગ-અલગ બહાના બતાવી બાકીના પૈસા સ્વીકારતો ન હતો અને ‘બાંધકામની સ્ટેમ્પ ડ્યુટી ભરવાની બાકી છે’ તેમ કહીને દસ્તાવેજ કરી આપવાનું ટાળતો હતો. વારંવાર રજૂઆત કરવા છતાં મકાન માલિકે દસ્તાવેજ ન કરી આપતા અને પૈસા પણ પરત ન કરતા આખરે મયુર મહેતાએ મિતેશ વિરુદ્ધ વાસણા પોલીસ સ્ટેશનમાં 10 લાખની છેતરપિંડીની ફરિયાદ નોંધાવી છે. પોલીસે આ મામલે વધુ તપાસ હાથ ધરી છે.
