Maharashtra News: મહારાષ્ટ્રના સતારા જિલ્લાના ફલટન વિસ્તારમાં એક 28 વર્ષીય મહિલા ડોક્ટરના આત્મહત્યાના કેસે આરોગ્ય અને પોલીસ વિભાગમાં ખળભળાટ મચાવ્યો છે. ડોક્ટરે આત્મહત્યા કરતા પહેલા એક હાથથી લખેલી સુસાઇડ નોટ અને ચાર પાનાનો પત્ર લખ્યો હતો, જેમાં તેણે કેટલાક વરિષ્ઠ અધિકારીઓ પર ગંભીર આરોપો લગાવ્યા હતા. સૂત્રોના જણાવ્યા અનુસાર, ડોક્ટર છેલ્લા કેટલાક મહિનાઓથી તબીબી તપાસને લઈને પોલીસ અધિકારીઓ સાથેના વિવાદમાં ફસાયેલી હતી, જેના કારણે તેની સામે વિભાગીય તપાસ પણ શરૂ થઈ હતી.
સુસાઇડ નોટમાં PSI પર બળાત્કારનો આરોપ
મૃતક ડોક્ટરે પોતાની સુસાઇડ નોટમાં પોલીસ સબ-ઇન્સ્પેક્ટર (PSI) ગોપાલ બડને પર સૌથી ગંભીર આરોપ લગાવ્યો છે. ડોક્ટરે સ્પષ્ટપણે લખ્યું છે કે, “પીએસઆઈ ગોપાલ બડનેએ મારા પર ચાર વખત બળાત્કાર કર્યો હતો. પોલીસ ઇન્સ્પેક્ટર ગોપાલ બડને મારા મૃત્યુનું કારણ છે.” વધુમાં તેણે લખ્યું કે, “તેણે પાંચ મહિનાથી વધુ સમય સુધી મને બળાત્કાર અને હેરાન કર્યો.” એટલું જ નહીં, ડોક્ટરે તેના હાથ પર પણ પેનથી કેટલાક નામો લખ્યા હતા અને તેમના પર ગંભીર આરોપો લગાવ્યા હતા. મુખ્યમંત્રીના આદેશ બાદ આરોપી PSI ગોપાલ બડનેને તાત્કાલિક અસરથી સસ્પેન્ડ કરી દેવામાં આવ્યા છે.
અન્ય નામો પણ વિવાદમાં
સુસાઇડ નોટમાં PSI ગોપાલ બડને ઉપરાંત બીજું નામ મૃતકના મકાનમાલિકના પુત્ર પ્રશાંત બાંકરનું પણ છે, જેની પોલીસે ધરપકડ કરી છે. આ ઉપરાંત, મૃતક ડોક્ટરનો બીજો ચાર પાનાનો પત્ર પણ સામે આવ્યો છે, જેમાં એક સાંસદ અને તેમના અંગત સચિવનો ઉલ્લેખ છે, જોકે તેમના નામનો સ્પષ્ટ ઉલ્લેખ કરવામાં આવ્યો નથી. મૃતક ડોક્ટરના સંબંધીએ જણાવ્યું કે તેમની ભત્રીજીએ અચાનક આત્મહત્યા કરી છે. તેમણે આક્ષેપ કર્યો કે પોસ્ટમોર્ટમ દરમિયાન અધિકારીઓ રિપોર્ટ બદલવાનું કહીને ડોક્ટરને હેરાન કરી રહ્યા હતા, જેના કારણે તેણે આ આત્યંતિક પગલું ભર્યું. પોલીસે સમગ્ર મામલે ગુનો નોંધીને તમામ પાસાઓની ગહન તપાસ શરૂ કરી છે.
