Aadhaar Card New Rules 2026: ભારતીય વિશિષ્ટ ઓળખ સત્તામંડળ (Unique Identification Authority of India – UIDAI) દ્વારા આધાર કાર્ડ મેળવવા અથવા તેમાં સુધારો કરવા ઈચ્છતા નાગરિકો માટે મહત્વના સમાચાર સામે આવ્યા છે. સત્તામંડળ દ્વારા આધાર (એનરોલમેન્ટ અને અપડેટ) પ્રથમ સુધારા નિયમો, 2026 (Aadhaar Enrolment and Update First Amendment Regulations, 2026) લાગુ કરવામાં આવ્યા છે. આ નવા ફેરફારોનો મુખ્ય ઉદ્દેશ્ય આધાર પ્રક્રિયાને વધુ પારદર્શક અને સુરક્ષિત બનાવવાનો છે.
નવા માન્ય દસ્તાવેજોની યાદી
UIDAI એ હવે સ્વીકાર્ય દસ્તાવેજોની યાદીમાં વધારો કર્યો છે. હવે નાગરિકો ઈ-વોટર આઈડી, ઈ-રેશન કાર્ડ, પેન્શન પેમેન્ટ ઓર્ડર, લગ્નનું પ્રમાણપત્ર (Marriage Certificate), અને છૂટાછેડાનો આદેશ (Divorce Decree) પણ રજૂ કરી શકશે. આ ઉપરાંત, બેંક પાસબુક (Bank Passbook), વીમા પોલિસી (Insurance Policy), વીજળી-પાણીના બિલ (Electricity-Water Bills), શૈક્ષણિક પ્રમાણપત્રો (Educational Certificates) અને રજિસ્ટર્ડ રેન્ટ એગ્રીમેન્ટ (Registered Rent Agreement) પણ માન્ય ગણાશે. વિશેષ કિસ્સાઓમાં નરેગા જોબ કાર્ડ (NREGA Job Card) અને કેદી ઓળખ પત્ર (Prisoner Identity Card) નો પણ ઉપયોગ થઈ શકશે.
ચકાસણીના કડક નિયમો
નવા નિયમો મુજબ, કોઈપણ દસ્તાવેજ ત્યારે જ સ્વીકારવામાં આવશે જ્યારે તે મૂળ અને માન્ય (Valid) હશે; એક્સપાયર થયેલા દસ્તાવેજો ચાલશે નહીં. ઓળખના પુરાવા (Proof of Identity – PoI) માં અરજદારનું નામ અને ફોટો હોવો અનિવાર્ય છે. જો અરજી પરિવારના વડા (Head of Family – HoF) ના આધારે કરવામાં આવે, તો સંબંધના પુરાવામાં બંનેના નામ હોવા જરૂરી છે.
બાળકો અને વિદેશી નાગરિકો માટે જોગવાઈ
5 વર્ષથી ઓછી ઉંમરના બાળકો માટે જન્મ પ્રમાણપત્ર સૌથી મહત્વનું રહેશે. 5 થી 18 વર્ષના બાળકો માટે પરિવારના વડા આધારિત નોંધણીને પ્રાથમિકતા આપવામાં આવશે. બીજી તરફ, ઓસીઆઈ કાર્ડધારકો અને નેપાળ-ભૂતાનના નાગરિકો માટે આધારની માન્યતા 10 વર્ષ રહેશે, જ્યારે અન્ય વિદેશીઓ માટે તે તેમના વિઝાની અવધિ સુધી જ સીમિત રહેશે.
સામાજિક ન્યાય પર ભાર
નવા નિયમોમાં ટ્રાન્સજેન્ડર વ્યક્તિઓ, અનાથ બાળકો અને દિવ્યાંગો માટે વિશેષ રાહત આપવામાં આવી છે. શેલ્ટર હોમ અને એચઆઈવી/એઈડ્સથી પ્રભાવિત લોકો માટે પણ અલગથી સુવિધા ઉભી કરવામાં આવી છે જેથી તેઓ સરળતાથી આધાર મેળવી શકે.
