ફિલ્મી સ્ટોરી જેવા છૂટાછેડા: કરોડોની સંપત્તિ છુપાવનાર પતિ જેલમાં ગયો, પત્ની બની કરોડપતિ

UK Court Divorce Case: બ્રિટનમાં (Britain) ભારતીય મૂળની મહિલા વર્ષા ગોહીલ (Varsha Gohil) માટે ન્યાય મેળવવાનો માર્ગ બિલકુલ સરળ નહોતો. બે દાયકાથી વધુ સમય સુધી ચાલેલી આ કાનૂની લડાઈ બાદ આખરે વર્ષા ગોહીલને 66 લાખ પાઉન્ડ એટલે કે અંદાજે 85 કરોડ રૂપિયાનું વળતર મળ્યું છે. આ કેસ બ્રિટનના ઈતિહાસમાં સૌથી ચર્ચિત અને નાટ્યાત્મક છૂટાછેડાના કેસોમાં સ્થાન પામ્યો છે, જ્યાં શરૂઆતમાં નજીવી લાગતી રકમ 23 વર્ષ બાદ કરોડો રૂપિયામાં ફેરવાઈ ગઈ.

વર્ષ 2002માં છૂટાછેડા અને પ્રારંભિક કરાર
આ સમગ્ર મામલાની શરૂઆત વર્ષ 2002માં થઈ હતી જ્યારે વર્ષા ગોહીલે પોતાના પતિ ભદ્રેશ ગોહીલ (Bhadresh Gohil) વિરુદ્ધ ખરાબ વર્તનનો આરોપ લગાવી છૂટાછેડાની અરજી કરી હતી. તે સમયે તેમને ત્રણ બાળકો હતા. બંને વચ્ચે થયેલા નાણાકીય કરાર (Financial Settlement) મુજબ ભદ્રેશે વર્ષાને 2,70,000 પાઉન્ડ (અંદાજે 3.5 કરોડ રૂપિયા) અને એક પ્યુજો કાર (Peugeot Car) આપીને મામલો થાળે પાડ્યો હતો. જો કે, વર્ષાને હંમેશા શંકા હતી કે તેના પતિએ પોતાની સાચી સંપત્તિ છુપાવી છે, પણ તે સમયે તેની પાસે કોઈ પુરાવા નહોતા.

મની લોન્ડરિંગ કેસ અને નવો વળાંક
આ કેસમાં મોટો વળાંક ત્યારે આવ્યો જ્યારે નાઇજીરીયાના (Nigeria) પૂર્વ ગવર્નર જેમ્સ ઇબોરી (James Ibori) સાથે જોડાયેલા એક મોટા મની લોન્ડરિંગ (Money Laundering) કેસમાં ભદ્રેશ ગોહીલને મુખ્ય આરોપી બનાવવામાં આવ્યો. તપાસ દરમિયાન બહાર આવ્યું કે ભદ્રેશે ઓફશોર કંપનીઓ (Offshore Structures) અને ગ્રાહકોના ખાતાઓ દ્વારા લાખો પાઉન્ડ ટ્રાન્સફર કર્યા હતા. વર્ષ 2011માં અદાલતે તેને મની લોન્ડરિંગ, બનાવટી દસ્તાવેજો અને છેતરપિંડીના ગુનામાં 10 વર્ષની જેલની સજા ફટકારી હતી.

સુપ્રીમ કોર્ટ દ્વારા કેસ ફરી ખોલવાનો ઐતિહાસિક નિર્ણય
આ ગુનાહિત તપાસ દરમિયાન ભદ્રેશની કરોડો પાઉન્ડની અઘોષિત સંપત્તિ સામે આવી, જેને છૂટાછેડા વખતે છુપાવવામાં આવી હતી. તપાસ એજન્સીઓએ તેની 28 મિલિયન પાઉન્ડની સંપત્તિ ફ્રીઝ કરી દીધી. આ ખુલાસા બાદ વર્ષાએ જૂના કરારને પડકાર્યો અને આ મામલો બ્રિટનની સુપ્રીમ કોર્ટ (Supreme Court) સુધી પહોંચ્યો. વર્ષ 2015માં સુપ્રીમ કોર્ટે એક ઐતિહાસિક ચુકાદો આપતા આ કેસ ફરી ખોલવાની મંજૂરી આપી અને સ્પષ્ટ કર્યું કે સંપત્તિ છુપાવનાર જીવનસાથીને તેનો લાભ મળી શકે નહીં.

હાઈકોર્ટનો આખરી ચુકાદો અને ન્યાય
લાંબી કાનૂની ખેંચતાણ બાદ આ મામલો હાઈકોર્ટના (High Court) જસ્ટિસ વિલિયમ્સ (Justice Williams) સમક્ષ આવ્યો. તેમણે ચુકાદો આપ્યો કે જપ્ત થયેલી સંપત્તિનો એક હિસ્સો કાયદેસરની કમાણીનો હતો અને તે વૈવાહિક સંપત્તિ (Marital Property) ગણાય. કોર્ટે તેમાંથી 66 લાખ પાઉન્ડ (85 કરોડ રૂપિયા) વર્ષા ગોહીલને આપવાનો આદેશ કર્યો. જજે ભદ્રેશ ગોહીલને ભારે દગાબાજ ગણાવ્યો હતો. ગયા મહિને કોર્ટ ઓફ અપીલે (Court of Appeal) આ કેસમાં વધુ કોઈ અપીલ ન સ્વીકારવાનો નિર્ણય આપતા આ 23 વર્ષ જૂની કાનૂની લડાઈનો કાયમી અંત આવ્યો છે.