Navsari Rain: દક્ષિણ ગુજરાતના નવસારી (Navsari) જિલ્લામાં મેઘરાજાએ રૌદ્ર સ્વરૂપ ધારણ કર્યું છે. નવસારીમાં સાંબેલાધાર વરસાદ પડવાને કારણે સમગ્ર જનજીવન અસ્તવ્યસ્ત થઈ ગયું છે. છેલ્લા 24 કલાકમાં નવસારી તાલુકામાં આભ ફાટ્યું હોય તેમ સૌથી વધુ 16 ઇંચ વરસાદ ખાબક્યો છે, જેના કારણે ચારેય તરફ પાણી જ પાણી જોવા મળી રહ્યું છે. માત્ર નવસારી જ નહીં, પરંતુ આસપાસના તાલુકાઓમાં પણ ભારે વરસાદ નોંધાયો છે, જેમાં જલાલપોર (Jalalpore) માં 12 ઇંચ, જ્યારે ગણદેવી (Gandevi) અને ચીખલી (Chikhli) માં 8-8 ઇંચ વરસાદ નોંધાતા સમગ્ર જિલ્લો જળબંબોળ બન્યો છે.
પૂર્ણા નદી ભયજનક સપાટી વટાવી 27 ફૂટે પહોંચી, અનેક વિસ્તારો પાણીમાં ગરકાવ
ભારે વરસાદના પગલે નવસારીની મુખ્ય પૂર્ણા નદી (Purna River) ઉફાન પર આવી ગઈ છે. નદીનું જળસ્તર સતત વધીને 27 ફૂટ પર પહોંચી ગયું છે, જે ભયજનક સપાટી કરતાં ઘણું વધારે છે. પૂર્ણા નદીમાં આવેલા પૂરના કારણે નદી કિનારાના અને નીચાણવાળા વિસ્તારોમાં પૂરના પાણી ફરી વળ્યા છે. શહેરના મુખ્ય રહેણાંક વિસ્તારો જેવા કે ગધેવાન મહોલ્લો (Gadhevan Mohalla), કમેલા દરવાજા (Kamela Darwaja) વિસ્તાર સંપૂર્ણપણે પાણીમાં ગરકાવ થઈ ગયા છે. આ ઉપરાંત ભેંસત ખાડા (Bhesat Khada) અને શાંતાદેવી (Shantadevi) જેવા વિસ્તારોમાં પણ ઘૂંટણસમા અને કમર સુધીના પાણી ભરાઈ જતાં સ્થાનિક લોકો મુશ્કેલીમાં મુકાયા છે.
રાતોરાત 1770 લોકોનું રેસ્ક્યૂ, આજે પણ ભારે વરસાદનું ‘રેડ એલર્ટ’
પૂરની આ ગંભીર સ્થિતિ વચ્ચે વહીવટી તંત્ર તાત્કાલિક એક્શનમાં આવ્યું હતું. રાત્રિ દરમિયાન જ ભારે જહેમત ઉઠાવીને નીચાણવાળા વિસ્તારોમાંથી 177૦ જેટલા લોકોનું સુરક્ષિત સ્થળે સ્થળાંતર (Evacuation) કરવામાં આવ્યું છે. આ તમામ સ્થળાંતરિત લોકોને વહીવટી તંત્ર દ્વારા નજીકના સેલ્ટર હોમ એટલે કે આશ્રય સ્થાનોમાં (Shelter Homes) રાખવામાં આવ્યા છે, જ્યાં તેમના માટે ભોજન અને તબીબી સુવિધાની વ્યવસ્થા કરવામાં આવી છે. હવામાન વિભાગ (IMD) દ્વારા નવસારી જિલ્લામાં આજે પણ ભારેથી અતિભારે વરસાદની આશંકા સાથે ‘રેડ એલર્ટ’ (Red Alert) જાહેર કરવામાં આવ્યું હોવાથી તંત્ર હજુ પણ હાઈ એલર્ટ પર છે.
