વિજાપુરના રામપુરમાં કળિયુગની ઘટના: પત્નીના પેટમાં લાતો મારી ગર્ભસ્થ બાળકને મારવાનો પતિ પર આરોપ!

Vijapur Rampur Case: મહેસાણા (Mehsana) જિલ્લાના વિજાપુર (Vijapur) તાલુકાના રામપુર (Rampur) ગામમાંથી એક અત્યંત ચોંકાવનારી અને માનવતાને શરમાવે તેવી ઘટના સામે આવી છે. અહીં એક પાપી પતિ અને તેના પરિવારજનોએ સંબંધોની ગરિમા લજવીને ગર્ભવતી પત્નીને બેરહેમીથી માર માર્યો હોવાનો ગંભીર આરોપ લાગ્યો છે. પત્નીના ગર્ભમાં રહેલા બાળક અંગે શંકા કરીને પતિએ તેના પેટના ભાગે ઉપરાઉપરી લાતો મારીને ગર્ભસ્થ શિશુને મારી નાખવાનો પ્રયાસ કર્યો હોવાની ચોંકાવનારી વિગતો બહાર આવતા સમગ્ર પંથકમાં ચકચાર મચી ગઈ છે. આ મામલે પીડિત મહિલાએ લાડોલ પોલીસ મથકે (Ladol Police Station) કાયદેસરની ફરિયાદ નોંધાવી છે.

પિયરથી પરત ફરેલી પત્ની પર તૂટી પડ્યો પરિવાર
મળતી માહિતી મુજબ, રામપુર ગામમાં રહેતી મહિલા તેના પતિના અવારનવારના ઝઘડા અને ત્રાસથી કંટાળીને છેલ્લા ૪ મહિનાથી પોતાના પિયર જતી રહી હતી. જો કે, તાજેતરમાં જ પતિએ પત્નીને સુધરી જવાની ખાતરી આપીને પરત તેડાવી હતી. આથી, દીકરીનું ઘર ન ભાંગે તેવા હેતુથી પીડિતાની માતા (સાસુ) પોતાની દીકરીને સાસરે મૂકવા માટે રામપુર ગામે આવ્યા હતા. પત્ની ઘેર પરત ફરી ત્યારે તે ગર્ભવતી હોવાની જાણ પતિને થઈ હતી. પત્ની ગર્ભવતી હોવાનું જાણતા જ પતિ કાળુસિંહનો (Kalusingh) પિત્તો ગયો હતો અને તેણે પત્નીના ચરિત્ર પર શંકા કરવાનું શરૂ કરી દીધું હતું.

ગર્ભસ્થ બાળક બાબતે સાસુને સવાલ કરી જીવલેણ હુમલો કર્યો
પતિએ પત્નીના ગર્ભમાં ઉછરી રહેલા બાળક બાબતે પોતાની સાસુને આડાઅવળા અને અણછાજતા સવાલો કરવાનું શરૂ કર્યું હતું. વાત આટલેથી ન અટકતા, ઉશ્કેરાયેલા પતિએ ગર્ભવતી પત્ની પર હિંસક હુમલો કરી દીધો હતો. તેણે પત્નીના ગર્ભસ્થ બાળકને નુકસાન પહોંચાડવાના ઈરાદાથી તેના પેટના ભાગે નિર્દયતાપૂર્વક લાતો મારી હોવાનો સનસનીખેજ આરોપ છે. આ ઘરેલું હિંસામાં માત્ર પતિ જ નહીં, પરંતુ સાસુ મંગુબા (Manguba), નણંદ અને માસીજી સહિતના સાસરીયાઓ પણ સામેલ થયા હતા અને સગર્ભા મહિલાને પશુની જેમ બેરહેમીથી માર માર્યો હતો.

લાડોલ પોલીસ મથકે ૪ શખ્સો સામે ગુનો દાખલ
આ હિંસક ઘટના બાદ પીડિત મહિલા અને તેની માતા માંડ-માંડ જીવ બચાવીને ત્યાંથી નીકળ્યા હતા. સાસરીયાઓના આ ક્રૂર વ્યવહાર અને ગર્ભસ્થ બાળક પર થયેલા હુમલા મામલે આખરે પોલીસનો આશરો લેવામાં આવ્યો છે. પીડિતાની ફરિયાદના આધારે લાડોલ પોલીસે (Ladol Police) કાળુસિંહ અને મંગુબા સહિત કુલ ચાર લોકો વિરુદ્ધ ગુનો નોંધી કાયદેસરની કાર્યવાહી હાથ ધરી છે. પોલીસે આ મામલાને અત્યંત ગંભીરતાથી લઈને નરાધમ પતિ સહિતના આરોપીઓની અટકાયત કરવા માટે ચક્રો ગતિમાન કર્યા છે.