jamnagar News: ગુજરાતના જામનગર શહેરમાંથી માનવતાને શરમાવે તેવી એક ચોંકાવનારી ઘટના સામે આવી છે. અહીં એક 14 વર્ષની માસૂમ સગીરા પર તેના જ પાડોશમાં રહેતા એક શખ્સે દુષ્કર્મ ગુજાર્યું હોવાની ઘટના પ્રકાશમાં આવી છે. પાડોશમાં જ રહેતા શબ્બીર અબ્બાસ નામના નરાધમે પાડોશી ધર્મને લજવીને આ માસૂમ બાળકી પર નરાધમ કૃત્ય આચર્યું હતું. આ ઘટનાને પગલે સમગ્ર પંથકમાં ભારે રોષ અને અરેરાટી વ્યાપી ગઈ છે.
સગીરા ગર્ભવતી બનતાં પાપનો ભાંડો ફૂટ્યો
આ ઘૃણાસ્પદ ગુનો ઘણા સમયથી છૂપો રહ્યો હતો, પરંતુ જ્યારે 14 વર્ષની માસૂમ સગીરા ગર્ભવતી બની ગઈ ત્યારે આ સમગ્ર મામલો બહાર આવ્યો હતો. સગીરાના શરીરમાં થયેલા બદલાવોને કારણે પરિવારજનોને શંકા ગઈ હતી. ત્યારબાદ પૂછપરછ અને તપાસ દરમિયાન સગીરા સાથે થયેલા આ અત્યાચારની હકીકત સામે આવી હતી. પાડોશી શબ્બીર અબ્બાસ નામના આરોપીના પાપનો ભાંડો ફૂટતા જ માસૂમ સગીરાના પરિવાર પર આભ તૂટી પડ્યું હતું.
પરિવારે સિટી-એ ડિવિઝન પોલીસ મથકમાં નોંધાવી ફરિયાદ
આ નરાધમ કૃત્યની જાણ થતાં જ સગીરાના પરિવારજનો તાત્કાલિક એક્શનમાં આવ્યા હતા. પીડિત સગીરાના પરિવારે જામનગરના સિટી-એ ડિવિઝન પોલીસ મથકમાં આરોપી શબ્બીર અબ્બાસ વિરૂદ્ધ વિધિવત રીતે ફરિયાદ નોંધાવી હતી. સગીરા વયની બાળકી પર થયેલા આ અત્યાચારની ગંભીરતાને ધ્યાનમાં લઈને પોલીસે તાત્કાલિક ગુનો નોંધી આગળની કાર્યવાહી હાથ ધરી હતી.
પોલીસે ગણતરીના કલાકોમાં આરોપીને દબોચ્યો, વૈજ્ઞાનિક તપાસ શરૂ
મામલાની સંવેદનશીલતા અને ગંભીરતાને જોતા જામનગર પોલીસ તુરંત હરકતમાં આવી હતી. પોલીસે જુદી જુદી ટીમો બનાવીને ગણતરીના કલાકોમાં જ નરાધમ આરોપી શબ્બીર અબ્બાસને ઝડપી પાડી જેલના સળિયા પાછળ ધકેલી દીધો છે. આરોપીને કોર્ટમાંથી કડકમાં કડક સજા થાય અને પીડિતાને ન્યાય મળે તે માટે પોલીસે અત્યારથી જ મજબૂત પુરાવા એકત્ર કરવાનું શરૂ કરી દીધું છે. આ કેસમાં કોઈ કચાસ ન રહી જાય તે માટે પોલીસે મેડિકલ ટેસ્ટ અને ડીએનએ પ્રોફાઇલિંગ સહિતની વૈજ્ઞાનિક તપાસ શરૂ કરી દીધી છે.
