Birgunj Violence: બાંગ્લાદેશમાં હિન્દુઓ પર થઈ રહેલા અત્યાચારના પડઘા હવે પડોશી દેશ નેપાળમાં પણ જોવા મળી રહ્યા છે. નેપાળના ભારત સરહદ અડીને આવેલા બીરગંજમાં સોશિયલ મીડિયા પર વાયરલ થયેલા એક વિવાદિત વીડિયો બાદ ભારે હિંસા ફાટી નીકળી હતી. ઉશ્કેરાયેલા ટોળાએ એક મસ્જિદમાં તોડફોડ કરતા સ્થિતિ વણસી હતી, જેના પગલે વહીવટીતંત્રએ તાત્કાલિક અસરથી કરફ્યુ લાદવાની ફરજ પડી હતી.
વિવાદનું મુખ્ય કારણ: સોશિયલ મીડિયા વીડિયો
પ્રાપ્ત વિગતો અનુસાર, આ સમગ્ર વિવાદની શરૂઆત ત્યારે થઈ જ્યારે હૈદરઅલી અંસારી અને અમાનત અંસારી નામના બે યુવકોએ ટિક-ટોક (TikTok) પર એક વિવાદિત વીડિયો શેર કર્યો હતો. આ વીડિયોના કારણે હિન્દુ સમુદાયની લાગણી દુભાતા વિરોધ પ્રદર્શનો શરૂ થયા હતા. જોકે, પોલીસે ત્વરિત કાર્યવાહી કરી બંને યુવકોની અટકાયત કરી લીધી હતી, પરંતુ ત્યાં સુધીમાં અફવાઓએ જોર પકડ્યું હતું અને મામલો વકર્યો હતો.
હિંસા અને પોલીસ કાર્યવાહી
બીરગંજના કમલા વિસ્તારમાં સ્થિતિ ત્યારે વધુ ગંભીર બની જ્યારે એક ટોળું મસ્જિદમાં ઘૂસી ગયું અને તોડફોડ શરૂ કરી. આ ઘટના બાદ બે પક્ષો સામસામે આવી ગયા હતા અને જોરદાર પથ્થરબાજી થઈ હતી. હિંસક બનેલા ટોળાને વિખેરવા માટે પોલીસે લાઠીચાર્જ કર્યો હતો અને આંસુ ગેસના સેલ છોડ્યા હતા. પરિસ્થિતિ પર કાબૂ મેળવવા માટે આખા બીરગંજમાં કરફ્યુ જાહેર કરવામાં આવ્યો હતો.
ભારતીય સરહદે હાઈ-એલર્ટ
બીરગંજ એ ભારતની સરહદને અડીને આવેલો જિલ્લો હોવાથી, હિંસાની અસર સરહદ પાર ન થાય તે માટે ભારત સરકાર પણ એક્શન મોડમાં આવી છે. સુરક્ષાના કારણોસર દક્ષિણ નેપાળ સાથે જોડાયેલી ભારતીય સરહદને સીલ કરી દેવામાં આવી હતી. સરહદ પર લોકોની અવરજવર અટકાવી દેવામાં આવી છે અને સુરક્ષા દળોને ‘હાઈ-એલર્ટ’ પર રાખવામાં આવ્યા છે.
વર્તમાન સ્થિતિ
તાજા અહેવાલો મુજબ, હિંસાની ઘટનાઓ બાદ હવે સ્થિતિ ધીમે-ધીમે શાંત પડી રહી છે. તંત્ર દ્વારા કરફ્યુ હટાવી લેવામાં આવ્યો છે, પરંતુ સાવચેતીના ભાગરૂપે પ્રશાસન અને પોલીસ દ્વારા સમગ્ર વિસ્તારમાં ચાંપતી નજર રાખવામાં આવી રહી છે. લોકોને અફવાઓથી દૂર રહેવા અપીલ કરવામાં આવી છે.
