ગયા અઠવાડિયે એક મહિલા સાંસદે ન્યુઝીલેન્ડની સંસદમાં AI દ્વારા જનરેટ કરાયેલ ન્યૂડ તસવીર બતાવી હતી. આ જોઈને આખું ગૃહ ચોંકી ગયું હતું. ન્યૂડ ફોટો બતાવતી વખતે સાંસદ લૌરા મેકલુરે કહ્યું, આ મારો ન્યૂડ ફોટો છે, પરંતુ તે વાસ્તવિક નથી. તેમણે વધુમાં એવું પણ કીધુ હતું કે, આ એક ડીપફેક તસવીર છે જે AIનો ઉપયોગ કરીને બનાવવામાં આવી છે.
મહિલા સાંસદે કહ્યું કે, આ તસવીર એટલી સાચી લાગે છે. જેને લીધે કોઈ પણ છેતરાઈ શકે છે. પરંતુ હકીકતમાં આ તસવીર નકલી નીકળી છે. સંસદને સંબોધતા લૌરાએ કહ્યું, કોઈપણ મહિલા કે છોકરીએ કોઈપણ સંજોગોમાં પરવાનગી વિના બનાવેલી ડીપફેક પોર્નોગ્રાફીનો ભોગ બનવું જોઈએ નહીં. આ સીધું શોષણ છે. આપણી કાયદો અને વ્યવસ્થા વ્યવસ્થા હજુ સુધી આ મુદ્દાનો સામનો કરવા માટે તૈયાર નથી અને આ સૌથી મોટી સમસ્યા છે.
સાંસદ લૌરા મેકલ્યુરે પણ આ છબી બનાવવાનું કેટલું સરળ હતું તે પર ભાર મૂક્યો હતો. તેમણે સમજાવ્યું કે, કેવી રીતે મહિલાઓની છબીઓને ખોટી રીતે રજૂ કરવા માટે AIનો ઉપયોગ કરવામાં આવે છે અને પીડિતો પાસે આ સામે કોઈ મજબૂત કાયદા નથી. આ મુદ્દાને ગંભીરતાથી લઈને લૌરાએ સંસદમાં ડીપફેક ડિજિટલ હાર્મ એન્ડ એક્સપ્લોઇટેશન બિલ રજૂ કર્યું છે. આ બિલમાં પરવાનગી વિના ડીપફેક પોર્નોગ્રાફિક સામગ્રી બનાવવા અને શેર કરવા પર સંપૂર્ણ પ્રતિબંધ મૂકવાની માંગ કરવામાં આવી છે.
મહિલા સાંસદે કહ્યું કોઈ પણ વ્યક્તિને એવું ન લાગવું જોઈએ કે તેનો નકલી ન્યૂડ ફોટો ઇન્ટરનેટ પર વાઈરલ થઈ રહ્યો છે અને તે સંપૂર્ણપણે લાચારી અનુભવે છે. આ ખૂબ જ ડરામણું અને અપમાનજનક છે. આપણે આ બંધ કરવું પડશે. લૌરા મેક્લુરનું આ સાહસિક પગલું હવે ફક્ત ન્યુઝીલેન્ડમાં જ નહીં પરંતુ સમગ્ર વિશ્વમાં ચર્ચાનો વિષય બની ગયું છે. આ ઘટના ડિજિટલ સુરક્ષા, ગોપનીયતા અને મહિલાઓ પ્રત્યેના સન્માન સંબંધિત મુદ્દાઓ પર વૈશ્વિક ચર્ચાની શરૂઆત છે.
