Strict Action on Road Rage: દેશના સૌથી વ્યસ્ત ગણાતા દિલ્હી-મુંબઈ-બરોડા એક્સપ્રેસવે પર એક ટ્રક ડ્રાઈવર દ્વારા કરવામાં આવેલા ખતરનાક સ્ટંટનો વીડિયો સોશિયલ મીડિયા પર વાયરલ થતા ચકચાર મચી ગઈ છે. ડ્રાઈવરની આ બેદરકારીને કારણે રસ્તા પર પસાર થતા અન્ય વાહનચાલકોના જીવ અધ્ધર થઈ ગયા હતા.
શું છે સમગ્ર ઘટના?
પ્રાપ્ત માહિતી અનુસાર, આ ઘટના ગત 3 ફેબ્રુઆરીના રોજ બની હોવાનું જાણવા મળ્યું છે. વાયરલ વીડિયોમાં સ્પષ્ટ જોઈ શકાય છે કે, ટ્રક ડ્રાઈવર અત્યંત જોખમી રીતે ટ્રક ચલાવી રહ્યો હતો. તે હાઈવે પર ટ્રકને આમ-તેમ લહેરાવીને (Zig-zag) સ્ટંટ કરી રહ્યો હતો, જેના કારણે પાછળ આવી રહેલી કાર અને અન્ય વાહનોમાં બેઠેલા લોકો ભારે દહેશત હેઠળ આવી ગયા હતા. ડ્રાઈવરના આ અનિયંત્રિત ડ્રાઈવિંગથી કોઈ મોટી દુર્ઘટના સર્જાઈ હોત તો અનેક લોકોના જીવ જઈ શક્યા હોત.
સોશિયલ મીડિયા પર વીડિયો વાયરલ
રસ્તા પરથી પસાર થતા અન્ય એક વાહનચાલકે આ સમગ્ર ઘટનાને પોતાના કેમેરામાં કેદ કરી લીધી હતી. વીડિયોમાં ટ્રકની સ્પીડ અને ડ્રાઈવરની જોખમી સ્ટાઈલ જોઈને નેટીઝન્સમાં ભારે રોષ જોવા મળ્યો હતો. લોકોએ ટ્રાફિક નિયમોના ધજાગરા ઉડાવતા આ ડ્રાઈવર સામે કડક કાર્યવાહી કરવાની માંગ કરી હતી.
પોલીસની ત્વરિત કાર્યવાહી
વાયરલ વીડિયોની ગંભીરતાને ધ્યાનમાં લેતા પોલીસે તાત્કાલિક તપાસ હાથ ધરી હતી. પોલીસ પ્રશાસને વીડિયોના આધારે ટ્રકનો નંબર શોધી કાઢ્યો અને ગણતરીના કલાકોમાં જ આરોપી ટ્રક ડ્રાઈવરની ઓળખ કરીને તેની ધરપકડ કરી લીધી છે. પોલીસે ડ્રાઈવર વિરુદ્ધ રેશ ડ્રાઈવિંગ અને અન્ય લોકોના જીવ જોખમમાં મૂકવા બદલ ગુનો નોંધી આગળની કાયદેસરની કાર્યવાહી શરૂ કરી છે.
