Salangpur Hanumanji: નૂતન વર્ષનો પ્રારંભ નિમિત્તે શ્રીકષ્ટભંજનદેવ હનુમાનજીદાદાને સુવર્ણ વાઘા અને સિંહાસને ફુલનો શણગાર, દર્શને ભક્તો ઉમટ્યા, છપ્પનભોગ અન્નકૂટ ધરાવાયો

Salangpur Hanumanji: સુપ્રસિદ્ધ યાત્રાધામ સાળંગપુરધામ શ્રી કષ્ટભંજનદેવ હનુમાનજી મંદિર ખાતે શાસ્ત્રી સ્વામી હરિપ્રકાશદાસજી (અથાણાવાળા)ની પ્રેરણાથી તેમજ કોઠાર વિવેકસાગરદાસજી સ્વામીના માર્ગદર્શનથી દિવાળીનું પાવન પર્વ-આજથી વિક્રમ સંવત 2082નું વર્ષ શરૂ થઈ રહ્યું છે. ત્યારે સાળંગપુરમાં વિરાજિત શ્રીકષ્ટભંજન દેવ હનુમાનજી મંદિરે મોટી સંખ્યામાં ભક્તો દાદાના દર્શન કરી નૂતન વર્ષની શરૂઆત કરી રહ્યા છે. આજે શ્રીકષ્ટભંજન દેવ હનુમાનજીને નૂતન વર્ષના દિવસે પ્યોર સોનાના 8 કિલો સોનામાંથી બનેલા વાઘા પહેરાવ્યા છે. આ સાથે જ દાદાના સિંહસને રંગબેરંગી ફુલનો શણગાર કરાયો છે.

આજે સવારે મંગળા આરતી કોઠારી વિવેકસાગરદાસજી સ્વામી દ્વારા કરવામાં આવી હતી. આ પછી શણગાર આરતી શાસ્ત્રી હરિપ્રકાશદાસ સ્વામી દ્વારા કરવામાં આવી હતી. આ આરતીનો લ્હાવો મોટી સંખ્યામાં ભક્તોએ લીધો હતો. આખું મંદિર પરિસર દાદાના ભક્તોથી હકડેઠઠ ભરાઈ ગયું હતું. મહત્ત્વનું છે કે, આજે ઠાકોરજી અને દાદાને વિવિધ વાનગીઓની સાથે છપ્પનભોગ અન્નકૂટ ધરાવાયો હતો. જેની આરતી શાસ્ત્રી હરિપ્રકાશદાસ સ્વામી-અથાણાવાળા દ્વારા કરવામાં આવી હતી. દરબારગઢમાં પણ નૂતનવર્ષે અન્નકૂટ ધરાવવામાં આવ્યો હતો.

શાસ્ત્રી હરિપ્રકાશદાસ સ્વામીએ જણાવ્યું કે, દાદાના દરબારમાંથી આપ સૌને જય શ્રીરામ અને જય શ્રીસ્વામિનારાયણ.. આજે હનુમાનજી મહારાજને ભવ્યાતિભવ્ય અન્નકૂટ ધરાવવામાં આવ્યો છે. 108 મીઠાઈ, 50થી વધુ ફરસાણ અને અનેક પ્રકારના શાકભાજી સાથે દાળભાત દાદાને અર્પણ કરવામાં આવ્યું છે. આ અન્નકૂટ હનુમાનજી મહારાજને જમાડી લાડલા ભક્તોને પ્રસાદમાં આપવામાં આવશે. આજે દાદાના ચરણમાં એટલી પ્રાર્થના કરીએ કે, અમારું જૂનું વર્ષ ગમે તેવું ગયું હોય પણ આ નવું વર્ષ આપ સૌને ગમે એવું જાય એવી પ્રાર્થના.

શ્રીકષ્ટભંજનદેવ હનુમાનજીના સુવર્ણ વાઘાની વિશેષતા

આજે નૂતનવર્ષના પ્રથમ દિવસે શ્રીકષ્ટભંજનદેવ હનુમનાજી દાદાને 8 કિલો સોનામાંથી બનેલાં વાઘા પહેરાવાયા છે. આ વાઘાની કિંમત 9 કરોડ રૂપિયા કરતા પણ વધારે છે. વર્ષ 2019માં આ વાઘા બનાવવા માટે 22 ડિઝાઇનર્સની ટીમ મંદિરના સંતો દ્વારા અપોઈન્ટ કરવામાં આવી હતી. આ વાઘાનું મુખ્ય કામ અંજારના હિતેષભાઈ સોનીએ કર્યું છે અને કેટલુંક કામ રાજકોટ અને જયપુરમાં પણ કરાવવામાં આવ્યું હતું. આ વાઘા બનાવવા માટે ડિઝાઇનર્સ સહિત 100 જેટલા સોનીઓની મદદ લેવાઈ હતી. આ લોકોએ 1050 કલાકની મહેનત બાદ દાદાના આ વાઘા તૈયાર કર્યા હતા. આ વાઘાને સંપૂર્ણ તૈયાર થવામાં એક વર્ષનો સમય લાગ્યો હતો.