Ahmedabad Digital Arrest News: અમદાવાદમાં ડિજિટલ અરેસ્ટ અને સાયબર ફ્રોડના કિસ્સાઓમાં ચિંતાજનક વધારો થઈ રહ્યો છે. તાજેતરમાં એક સિનિયર સિટીઝન સાથે થયેલી 25 લાખની છેતરપિંડીની તપાસ કરતા અમદાવાદ સાયબર ક્રાઈમ બ્રાન્ચે એક મોટા આંતરરાષ્ટ્રીય સિમ કાર્ડ કૌભાંડનો પર્દાફાશ કર્યો છે. પોલીસે આ કૌભાંડમાં સંડોવાયેલા ચાર આરોપીઓની ધરપકડ કરી છે, જેમણે છેલ્લા બે વર્ષમાં ગુજરાતમાંથી 1000થી વધુ સિમ કાર્ડ ગેરકાયદેસર રીતે દુબઈ મોકલ્યા હોવાનું સામે આવ્યું છે.
કૌભાંડ કઈ રીતે આચરવામાં આવતું?
પોલીસ તપાસમાં બહાર આવ્યું છે કે, આરોપીઓ સામાન્ય નાગરિકોને નિશાન બનાવતા હતા. ભોગ બનનાર એક ગ્રાહક પિતાના નામનું સિમ પોતાના નામે કરાવવા એજન્ટ પાસે ગયા હતા. એજન્ટ વિજય રાવળે તેમના બાયોમેટ્રિક્સ લઈ લીધા બાદ ‘ટેકનિકલ એરર’ આવી છે તેમ કહી પ્રોસેસ અટકાવી દીધી હતી. પરંતુ હકીકતમાં, ગ્રાહકની જાણ બહાર સિમ એક્ટિવેટ કરી લેવામાં આવતું હતું અને તે સીધું દુબઈ રવાના કરી દેવામાં આવતું હતું. આ સિમ કાર્ડનો ઉપયોગ દુબઈમાં ચાલતા ગેરકાયદેસર કોલ સેન્ટરો, સટ્ટાબેટિંગ અને ગેમિંગ એપ્લિકેશન્સમાં થતો હતો.
કોની કોની ધરપકડ થઈ?
પોલીસે મુખ્ય એજન્ટ વિજય રાવળ, શુભમ પરાડિયા, કિરણ ઠક્કર અને દુબઈથી આવતા-જતા કુરિયર મેન કુલદીપ જોશીની ધરપકડ કરી છે. કુલદીપ જ્યારે પણ ભારત આવતો ત્યારે શુભમ અને કિરણ પાસેથી સિમ કાર્ડનો જથ્થો લઈ દુબઈ પહોંચાડતો હતો.
દુબઈમાં ‘લાદેન’નું નેટવર્ક
તપાસમાં ખુલાસો થયો છે કે દુબઈમાં બે મુખ્ય સૂત્રધારો ભાવેશ જોશી ઉર્ફે લાદેન અને કનુ વારાહી આ નેટવર્ક ચલાવતા હતા. તેઓ ભારતીય એજન્ટોને એક સિમ કાર્ડના બદલામાં 1500 રૂપિયા ચૂકવતા હતા. હાલ પોલીસે દુબઈ સ્થિત વોન્ટેડ આરોપીઓ સામે પણ કાર્યવાહી હાથ ધરી છે.
