Keshod Crime News: ગુજરાતમાં દીકરીઓની સુરક્ષા સામે સવાલ ઉઠાવતી એક ચોંકાવનારી ઘટના સામે આવી છે. કેશોદ પોલીસ મથકમાં એક યુવતીએ પોતાની સાથે સગીર વયે થયેલા શારીરિક શોષણ અંગે ફરિયાદ નોંધાવતા પોલીસે ગણતરીના કલાકોમાં જ આરોપી જી.આર.ડી. (GRD – Gram Rakshak Dal) જવાનની ધરપકડ કરી લીધી છે. આરોપીએ સગીરા સાથે ઇન્સ્ટાગ્રામ (Instagram) પર મિત્રતા કેળવીને ન્યૂડ ફોટા વાયરલ કરવાની ધમકી આપી વારંવાર દુષ્કર્મ આચર્યું હોવાનો સનસનીખેજ ખુલાસો થયો છે.
લગ્ન પ્રસંગમાં મુલાકાત બાદ ઇન્સ્ટાગ્રામ પર કેળવી મિત્રતા
મળતી માહિતી મુજબ, ભોગ બનનાર પીડિતા જ્યારે સગીર વયની હતી ત્યારે એક લગ્ન પ્રસંગ દરમિયાન તે આરોપીના સંપર્કમાં આવી હતી. ત્યારબાદ આરોપીએ સોશિયલ મીડિયા પ્લેટફોર્મ ઇન્સ્ટાગ્રામ (Instagram) પર સગીરા સાથે મિત્રતા કેળવી હતી. આરોપીએ સગીરાને જુદી જુદી લાલચો આપીને પોતાની જાળમાં ફસાવી હતી અને તેની સાથે શારીરિક સંબંધો બાંધ્યા હતા.
ન્યૂડ ફોટા પાડી વારંવાર બ્લેકમેઇલિંગ અને દુષ્કર્મ
આરોપી આટલેથી જ અટક્યો ન હતો, તેણે સગીરાના કેટલાક આપત્તિજનક અને ન્યૂડ ફોટા (Nude Photos) પોતાના મોબાઇલમાં પાડી લીધા હતા. આ ફોટા સોશિયલ મીડિયા પર વાયરલ કરી દેવાની અને પરિવારને બતાવી દેવાની ધમકી આપીને આરોપીએ સગીરા પર વારંવાર દુષ્કર્મ આચર્યું હતું. બદનામીના ડરથી સગીરા લાંબા સમય સુધી આ અત્યાચાર મૂંગા મોઢે સહન કરતી રહી હતી.
યુવતી પુખ્ત વયની થતાં જ હિંમત દાખવી નોંધાવી ફરિયાદ
લાંબા સમય સુધી માનસિક અને શારીરિક ત્રાસ ભોગવ્યા બાદ, પીડિત સગીરા હવે પુખ્ત વયની (Adult) થતાં તેણે આ નરાધમ સામે કાયદાકીય લડત આપવાનું નક્કી કર્યું હતું. યુવતીએ હિંમત પૂર્વક કેશોદ પોલીસ સ્ટેશન (Keshod Police Station) નો સંપર્ક કરીને પોતાની સાથે ઘટેલી સમગ્ર આપવીતી જણાવી આરોપી વિરુદ્ધ ગુનો દાખલ કરાવ્યો હતો.
કેશોદ પોલીસે પોકસો હેઠળ પોરબંદરના આરોપીની કરી ધરપકડ
ઘટનાની ગંભીરતાને ધ્યાનમાં રાખીને કેશોદ પોલીસે તાત્કાલિક ધોરણે કાયદેસરની કાર્યવાહી હાથ ધરી હતી. પોલીસે આરોપી વિરુદ્ધ પોકસો (POCSO – Protection of Children from Sexual Offences Act) સહિતની વિવિધ કડક કલમો હેઠળ ગુનો નોંધી તપાસના ચક્રો ગતિમાન કર્યા હતા. પોલીસે ગણતરીના કલાકોમાં જ ગુનામાં સંડોવાયેલા આરોપી અરમાન મકવાણા (Arman Makwana), રહેવાસી. ઊંટડા (Untada), જી. પોરબંદર (Porbandar) ની ધરપકડ કરી જેલના સળિયા પાછળ ધકેલી દીધો છે. પકડાયેલો આરોપી પોતે જી.આર.ડી. (GRD) જવાન તરીકે ફરજ બજાવતો હોવાનું સામે આવતા ચકચાર મચી ગઈ છે.
