The India Story: સામાજિક મુદ્દા પર આધારિત આગામી કોર્ટરૂમ ડ્રામા ફિલ્મ ‘ધ ઇન્ડિયા સ્ટોરી’ (The India Story) ના નિર્માતાઓએ ફિલ્મનું વધુ એક પ્રભાવશાળી પોસ્ટર રિલીઝ કર્યું છે. આ નવા પોસ્ટરે દર્શકોમાં ફિલ્મ પ્રત્યેની ઉત્સુકતા અને રોમાંચ બેવડાવી દીધો છે. ઝી સ્ટુડિયોઝ (Zee Studios) ના સહયોગથી એમઆઈજી પ્રોડક્શન એન્ડ સ્ટુડિયોઝ (MIG Production & Studios) દ્વારા પ્રસ્તુત આ ફિલ્મનું નિર્દેશન ચેતન ડીકે (Chetan DK) દ્વારા કરવામાં આવ્યું છે. જ્યારે આ રસપ્રદ ફિલ્મની વાર્તા અને નિર્માણની જવાબદારી સાગર બી. શિંદે (Sagar B. Shinde) એ સંભાળી છે. આ ફિલ્મ ૨૪ જુલાઈ ૨૦૨૬ના રોજ વિશ્વભરના સિનેમાઘરોમાં હિન્દી, તેલુગુ અને તમિલ ભાષાઓમાં રજૂ થવા જઈ રહી છે.
જંતુનાશક ખેતી અને સ્વાસ્થ્ય પર ગંભીર અસરોનો મુદ્દો
આ ફિલ્મ જંતુનાશક ખેતી (Pesticide Farming) અને તેના કારણે માનવ સ્વાસ્થ્ય પર પડતી ગંભીર અસરો જેવા અત્યંત સંવેદનશીલ વિષય પર પ્રકાશ પાડે છે. ફિલ્મ એક રોમાંચક કોર્ટરૂમ ડ્રામા (Courtroom Drama) ના માધ્યમથી સમાજની એક મોટી કડવી વાસ્તવિકતાને સામે લાવશે. તાજેતરમાં રિલીઝ થયેલા નવા પોસ્ટરમાં મુખ્ય કલાકારો કાજલ અગ્રવાલ (Kajal Aggarwal) અને શ્રેયસ તલપડે (Shreyas Talpade) એક તણાવપૂર્ણ અને ભાવનાત્મક સ્થિતિમાં જોવા મળી રહ્યા છે. આ પોસ્ટર સ્પષ્ટ સંકેત આપે છે કે ફિલ્મમાં તેમના પાત્રો સમાજ સામે એક મોટી સચ્ચાઈ લાવવા માટે ખૂબ જ કઠિન સંઘર્ષમાંથી પસાર થવાના છે.
શાકભાજી માર્કેટનું વાતાવરણ અને ઉગ્ર વિરોધ
ફિલ્મનું આ નવું પોસ્ટર શાકભાજી માર્કેટ એટલે કે સબ્જી મંડી (Vegetable Market) ના બેકગ્રાઉન્ડ પર આધારિત છે, જે ડર, ગુસ્સો અને તીવ્ર વિરોધની લાગણીઓ દર્શાવે છે. પોસ્ટરમાં કાજલ અગ્રવાલ અને શ્રેયસ તલપડે એક આક્રોશિત ભીડથી ઘેરાયેલા જોવા મળે છે, જ્યાં ગુસ્સે ભરાયેલા વેપારીઓ તેમના પર આંગળીઓ ચીંધી રહ્યા છે અને શાકભાજી ફેંકી રહ્યા છે. કલાકારોના ચહેરા પરનો ડર, હવામાં ઉડતી શાકભાજી અને ઉગ્ર ભીડ એ વાતની સાબિતી છે કે સત્ય ઉજાગર કરનારાઓને કેવા પડકારોનો સામનો કરવો પડે છે. આ પોસ્ટર પર લખેલી ટેગલાઇન “સ્લો પોઇઝન ઇન પ્રોગ્રેસ” (Slow Poison in Progress) ફિલ્મના મુખ્ય વિષયને વધુ મજબૂત બનાવે છે અને એવા છુપા ભય તરફ ઈશારો કરે છે જે ધીમે-ધીમે લાખો લોકોના જીવનને અસર કરી રહ્યો છે.
દિગ્દર્શક ચેતન ડીકેનું નિવેદન
આ વિષય પર વાત કરતા ફિલ્મની કમાન સંભાળનાર ડાયરેક્ટર ચેતન ડીકેએ જણાવ્યું હતું કે, “આ પોસ્ટર સત્ય બોલવાની કિંમત દર્શાવે છે. જ્યારે કોઈ જૂઠાણા પર આધારિત વ્યવસ્થાને પડકારવામાં આવે છે, ત્યારે સામાન્ય રીતે પહેલી પ્રતિક્રિયા ડર અને ગુસ્સા તરીકે જ સામે આવે છે. ‘ધ ઇન્ડિયા સ્ટોરી’ ની દરેક ફ્રેમ આ જ સંઘર્ષને દર્શાવવા અને દર્શકોને એ વિચારવા માટે મજબૂર કરવા માટે બનાવવામાં આવી છે કે તેઓ શું ખાઈ રહ્યા છે અને કોના પર વિશ્વાસ કરી રહ્યા છે.”
નોંધનીય છે કે આ ફિલ્મના સહ-નિર્માતાઓ સ્વાતિ વિનાયક સૈંદાને (Swati Vinayak Saindane), અનિતા જાધવ (Anita Jadhav), વિનાયક સૈંદાને (Vinayak Saindane), કલ્પેશ શાહ (Kalpesh Shah), દેવયાની ખોરાટે (Devayani Khorate) અને પ્રેમ જોશી (Prem Joshi) છે. ફિલ્મની ટેકનિકલ ટીમ પણ ખૂબ મજબૂત છે, જેમાં સિનેમેટોગ્રાફર નિશાંત ભાગવત (Nishant Bhagwat), સંગીતકાર મંગેશ ધકડે (Mangesh Dhakde), એડિટર આશિષ મ્હાત્રે (Ashish Mhatre), ગીતકાર શકીલ આઝમી (Shakeel Azmi) અને સાઉન્ડ ડિઝાઇનર અનમોલ ભાવે (Anmol Bhave) સામેલ છે.
